Nagsagunson ang pagsulod sa mga kusog nga kakulian sa panahon dinhi sa Pilipinas sama sa gipaabot matag tuig.
Bisan ang subsob nga pangandam sa nagkadaiyang LGUs sa mga naagian niini, kuwang gihapon tungod sa dili matagnang epekto niini.
Usa sa sanglitanan mao ang epekto sa ikalimang bagyo nga nisulod sa Pilipinas sa miaging semana nga mao ang Bagyong Egay nga dunay international name nga Doksuri nga nagbilin og bilyones ka pesos nga danyos sa agrikultura, imprastraktura ug kabtangan sa mga residente.
Wala motugpa sa kayutaan ang maong bagyo kay nagpabilin lang kini didto sa kadagatan apan naa sa sulod sa Philippine Area of Responsibility.
Apan tungod sa kalapad niini nabira niini ang hanging habagat.
Daan ng nagdala og kusog nga hangin ang hanging habagat apan gipasamot kini og kakusog sa maong bagyo nga nagdala sab og kusog nga hangin ug uwan hinungdan sa dakong kadaut nga nahiaguman sa Luzon partikular sa sidlakang bahin niini.
Normal na sa nasud ang 20 ka bagyo matag tuig, ug ang katunga niini halos tanan anha motapsing sa kabisay-an padung sa direksyon Luzon.
Apan sa naghinapos nga bahin sa tuig, ang bagyo motapsing o motadlas na gikan sa kadagatan sa habagatang-sidlakang bahin sa Mindanao lahus sa sentro sa kabisay-an padung sa kasadpang kabisay-an (Palawan area). Ang mga LGUs kutob ra gyud sa pagpangandam kutob sa ilang mahimo, apan ang dunay dakong papel aron kamenusan ang mga insidenteng dunay makalas mao ang kooperasyon sa mga konstituwente niini.
Usa niini ang pagsigurong hawan kanunay ang mga kanal, mga kasapaan pinaagi sa kanunay nga pagpanglimpyo niini gikan sa tanang mga basura nga makabara.
Sunod sab ang kooperasyon sa mga pasidaan sa LGUs ngadto sa mga residenteng naa duol sa peligrosong mga lugar ang pinuy-anan sama sa kiliran sa mga bukid, sapa ug baybayon sa dagat.
Kung ang katawhan mopatuo lang ug motuman sa preparasyon sa LGUs, malikayan gyud ang mas grabeng epekto aning mga bagyo.