Pagdayeg ug pagnaway

Nakaani og mga pagdayeg gikan sa mga lokal nga leader dinhi sa Sugbo si Presidente Ferdinand Marcos, Jr., sa iyang SONA nga gihulagway nila nga usa ka impresibo ug komprehensibo’ng report sa mga nahimo sa iyang administrasyon.

Apan sa habig sa mga cause-oriented groups, hagbong nga marka ang gihatag nila sa Presidente. Gihulipan usab nila ang slogan sa administrasyon. Inay “Bagong Pilipinas” gitawag nila kini’g “Bigong Pilipinas." Dili kahibudngan ang reaksyon sa matag habig. Matud pa bitaw, “Alang sa imong alalay, dili na kinahanglan pasabton; apan alang sa imong kaaway, kawang ang bisan unsang matang sa pagpasabot.” Fezteleern!

Dili unta mo-sahâ

Gidawat sa Presidente ang resignation sa 18 ka third-level officers sa PNP nga giingong nalambigit sa illegal nga druga dinhi sa nasud. Mahinumduman nga mitahan sa ilang courtesy resignation ang 953 ka opisyal sa PNP ug gipahigayon gilayon sa ad hoc advisory group ang imbestigasyon nga miresulta sa pagrekomendar sa pagdawat sa resignation sa 18 ka PNP O+cials. Ning maong kalambuan, naglaum ang katawhan nga mahunong na usab sa hinay-hinay ang negosyo sa illegal nga druga. Hinaut nga dili sama sa punoan sa saging ang kamanduan sa PNP diin inig kaputol sa punoan, modaghan hinuon ang saha. Madahaan!

Pasidaan sa mga smugglers

Mipasidaan si Presidente nga maihap na lang ang mga adlaw sa mga smugglers ug hoarders sa mga produktong agrilkultura dugang ang pagsaad nga pasakaan gyud og kaso kadtong nalambigit sa ilegal nga kalihukan. Gipaabot sa katawhan ang katumanan sa maong pasidaan ug saad sa President aron mabungkag na kining smuggling cartel. Sa ingon, maamguhan sa mga smugglers ug hoarders nga, “Kon magtigom ka’g sobrang pag-kaon, kini malata; kon magtigom ka’g sobrang bahandi, ikaw ang madugta. Apan kon magtigom ka’g gahum, ang nasud mismo maoy madugta.” Muleeng!

Kultura Ug Mentalidad

Mipunting karon ang DOTr sa pagpahigayon sa implementasyon sa mga public transport projects lakip na ang Cebu Bus Rapid Transit (CBRT) aron ang mga tag- iya’g pribadong sakyanan mopili na sa public transportation. Daw layo pa makab-ot ang pangandoy sa DOTr kay dili pa episyente ang atong intermodal public transport system. Angayan usab ikonsiderar ang kultura ug mentalidad sa katawhang Pilipinhon. Matud pa sa akong amigo, “Nag-agwanta gani sa bawod sa dagat ug sa kainit sa disyerto aron lang makapalit og sakyanan, unya di na hinoon pagamiton”. Pagkatoytoy!

Guide lang diay

Tungod kay nagsingabot na ang abli sa klase, mipagawas na usab ang DTI og price guide sa presyo sa mga school supplies. Gitawag sa DTI ang guide nga “Gabay sa Pamimili ng School Supplies” nga ilang gipatik sa pipila ka mantalaan. Maayo unta kon hugot usab ang monitoring sa DTI sa compliance sa mga tindahan sa maong price guide. Makapahinumdum kini sa estorya-komedya kabahin sa reklamo sa konsumidor ngano nga mahal kaayo ang presyo sa baligya nga school supplies kon itandi sa presyo nga gilatid sa DTI. Niini mitubag lang ang tag-iya sa tindahan nga, “Adto palit sa DTI”. Fishkots!