Aksidente sa tunnel

Nakahinumdom pa ba mo nga daghang nangaangol dihang mga motorsiklo nadam-agan ilawom sa tunnel diha sa Plaza Independencia ning Dakbayan sa Sugbo?

Nahitabo ang maong aksidente atol sa kusog nga pagbunok sa uwan, kay ang mga nagsakay og motorsiklo mihunong man ug wa modayon paggawas sa tunnel kay mahadlok nga mabasa sa uwan.

Diha sila maglinya sa daplin ilawom sa tunnel. Timan-i nga ang mga sakyanan nga mangagi sa tunnel, kusog nga nagdagan ug pagkakita sa driver sa naglinya nga mga motor, milihay siya.

Two-way lanes ang matag direksyon sa tunnel, mao nga paglihay sa nag-una nga sakyanan, nabag-iran siya sa sakyanan nga nagsunod niya.

Ang sakyanan nga nabag-iran, nalagpot paingon sa mga nagparking nga motorsiklo ug maoy hinungdan nga tabla ra sila og “bungkag-lampinig.”

Akong nahinumdoman nga siyam ka tawo ang nangaangol ug nagkadugo nga gidala sa ospital, samtang ang ilang mga motorsiklo nangakupog.

Sa ato pa, kon wa pa magparking daplin sa tunnel ang maong mga motorsiklo, wa unta’y aksidente nga mahitabo. Wa unta maangin kadtong nagsakyanan nga milihay gani unta.

Karon, nakabantay ko nga ang susama nga binuang nga gihimo sa ubang driver og motorsiklo kaniadto, mibalik na sab.

Nakaagi ko sa tunnel atol nga kusog sab ang pagbunok sa uwan, daghan na usab kaayong mga nagmotor nga namarking ilawom sa tunnel.

Mora ba og nahadlok sila nga mahilis kon mabasa sa uwan, apan wa masulod sa ilang utok nga tungod sa ilang gihimo, mahimo pa nga ang ilang birthday mabalhin na sa Nobiyembre 1.

Kini maoy rason nga karong Martes atol sa miting namo sa Cebu City Traffic Management Board, akong isugyot nga estriktohon na gyud nga did-an ang mga motorsiklo nga moagi sa tunnel.

Unta, dili mangasuko ang mga motorista, kay bisan ako magsakay sab og motor. Para kini sa atong “safety” ang paghimo niini.

Ikaduha, hangyoon namo ang Cebu City Council nga mogama sila og ordinansa, kana kon wa pa sila makahimo og ordinansa kabahin niini.

Kinahanglang estriktohon nga dili gyud paagion sa tunnel ang mga oil tanker, o mga sakyanan nga magkarga og gasolina, krudo, kerosene, LPG, kay dihang nahuman na paghimo ang tunnel, gidiskutir ni sa City Council nga did-an ang maong sakyanan nga moagi diha.

Apil nga angay’ng did-an pagpaagi sa tunnel, mga bisekleta, tricycle, karomata, E-bikes, ug ubang matang sa hinay managan nga sakyanan.

Ang mga motorsiklo kusog nga modagan, apan peligro kay posible nga mapalid sila kon matuparan og mga dagko nga sakyanan ug sa ingon makamugna sila og disgrasya, makaamong pa sa ubang motorista.