Logo'ng nindot giilisa'g maot

Enero 3, 1983. Maoy unang adlaw pagsugod nako'g trabaho sa casino isip card dealer ubos sa pribadong pagdumala sa mga Macau. Diin ang logong gibutang sa walang dughan nga bahin sa among unipormeng short sleeve barong nakatatak ang Philippine Casino Operators Corporation (PCOC).

Pagka 1986, diin milampos ang Edsa Revolution pagpatalsik ni kanhi Presidente Ferdinand E. Marcos, kinsa mitugot nga mabutangag mga casino ang Pilipinas sugod 1978, diin sa sinugdanan, floating casino ra, pero sa pagpanglabay sa katuigan, nabalhin na sa mamala, nasirag mga usa ka bulan kapin ang PCOC.

Labihan nakong guola. Puwerting pangusog sa mga kadagkoan sa simbahan, kinsa pulos lakas sa gipalingkod nga Presidente Cory C. Aquino, nga kinahanglang dili na abliha'g balik ang among trabahoan. Daghang higanteng politiko naanugonan sa minilyong kita sa casino nga mapunta sa gobiyerno kon hingpit kining ipasira. Ug milampos sila pagkombinse ni Cory. Human mahinginli ang pribadong Macau management, maoy mipuli atong gobiyerno. Ug ang PCOC logo, giilisag PAGCOR (Philippine Amusement and Gaming Corporation).

Nindot ang orihinal nga PAGCOR logo: Adlaw'ng yellow gisapnay og duroha ka binukhad berdeng kamot. Maklaro ang mensaheng gipasabot: “Bridging the gap between the haves and the have nots. Ang paghatod sa naghinobrang bahandi gikan sa mga adunahan ngadto sa mga pobreng nanginhanglan. Ang adlaw nagsimbolo og bulawan nga naani sa nagtinabangay'ng makugikhong kamot sa tanang Pagcor employee, kinsa andam mopaambit-hatod sa ilang abot ngadto sa mga kabos tang kaigsuonan.

Wala mogasto'g dako ang Pagcor management kaniadto dihang gipresentar ang maong logo. Kay sa tinuoray lang, pulos talented ang Pagcorians. Daghan ang makamao-himo niini.

Busa, makapakurat! Nganong ang bag-ong Pagcor top management mipasiatab sa paglusad og bag-ong logong mibalor og P3 million aron maoy ipuli sa orihinal, nga padayon man unta ang dalaygong pagpangalagad niini ngadto sa atong nasod ug katawhan?

Ultimong pobre'g math, dili makatuong moabot og P3 million ang presyo ning gihisgotang logo nga daw kaamgid ang mga bulok ug desinyo sa usa ka oil company. Unya, giporma pag mga sungay

Hinungdan, mianig nagkadaiyang pagsaway. Ug nakahatag og ideya unsang matanga sa pagka-chairman and chief executive officer, kining gibutang ni PBBM sa kinatas-ang puwesto sa Pagcor? Daginotan ba, o usikan?