Sama sa cancer

Segun sa labing ulahi’ng datos sa Bureau of Treasury, ang utang sa atong nasud mikabat na sa P 14 trillion sa katapusan sa bulan sa Mayo ni’ng tuiga.  Agi og pagdepensa, namahayag si Finance Secretary Diokno nga ang pagpangutang dili man dautan. Ang mahinungdanon kon diin ang utang madapat.  Natumbok ni Diokno ang isyu kay dili man malilong ang kuyanap nga kurapsyon sa kagamhanan.  Gani, dakong kahibulongan nga ni’ng maong hisgutanan, wala’y mga kongresman ug senador nga mitiyabaw ug nagpaminti sa kasuko.  Ginaingon baya nga “Ang utang sama sa sakit nga cancer.  Gun-obon niini ang nasud mismo sa sulod.”  Fezteleern!

Inutil pagbatok sa hulga

Matud pa sa BFAR, ang fisheries sector sa nasud nag-atubang sa padayon nga hulga gumikan sa mga illegal, wala ma-regulate ug wala mataho nga mga pagpanagat nga nakasabotahe sa delikado’ng kahimtang sa marine ecosystem. Miangkon ang Department of Agriculture-BFAR nga nasayod sila sa maong hulga. Bisan sa maong pag-angkon, daw inutil man gihapon ang atong kagamhanan pagtuman sa ilang mandato pagpanalipod sa atong kadagatan.  Mao kini resulta kon ang mga opisyales sa BFAR wala gani tingale makaila sa kalainan sa taga ug sa tangsi, o ba kaha sa isda’ng bogo ug sa tambaliyon.  Madahaan!

Tumaron bisan hilo

Gitahasan sa DOH ang Food and Drug Administration (FDA) sa pag-imbestigar sa online nga pagkatap sa mga peke nga celebrity endorsement sa mga dili rehistrado’ng tambal ug food supplements.  Kuyanap na sa social media ang pag-advertise sa mga tambal diin mogamit ang tigpasiugda og mga inilang doktor o personalidad aron mo-endorso sa produkto, luyo sa kamatuoran nga mismo ang nag-endorsar dili gani mogamit sa produkto nga iyang gipromote.  Angayan pasidan-an sa kagamhanan ang katawhan.  Daghan kanato nga tungod sa gihambin nga balatian, motumar na lang bisan hilo aron lang mamaayo. Pagkatoytoy!

Nangatagak nga bahandi

Nangaliyupo sa mga hingtungdan ang kolektor sa usa ka money remittance company nga i-uli unta ang kwarta nga ilang napunit didto sa SRP human kini mangatagak gikan sa iyang gisudlan nga backpack.  Nagkapuliki ang nanglabay nga mga motorista pagpamunit sa nagpasad nga kwarta apan inay i-uli kini, gisakiyo man hinuon sa uban’g nakapunit. Managlahi’ng kinaiya ug hiyas sa tawo ang gipadayag sa maong panghitabo: adunay maayo ug adunay salbahis. Alang  sa naulahi, ang kwarta parehas ra nga ikapalit og bugas, pinunitan man kini o hinagoan. Gibangkong na!

Hustong pagdumala

Namahayag ang MCWD nga ang ika-tulo ka bahin sa tubig nga ilang na-produce matag adlaw nga mokabat og 86,000 ka metro kubiko nausik lang tungod sa mga gubaon ug busloton nila nga mga tubo ingon man sa mga libre’ng tubig nga gihatag sa MCWD ngadto sa mga bombero. Tataw nga walay kalambigitan ang mga konsumidor ni’ng nausik nga tubig sa MCWD ug labaw nga wala kini nila magamit.  Apan nalakip kini sa billing sa mga konsumidor nga gitawag og systems loss. Maayo nga pahinumduman ang MCWD nga ang sistema dili maantigo modumala sa iyang kaugalingon lamang, busa angayan dumalahon kini sa husto ug tarong. Muleeng!