Bisan nganlan og kaldereta

Gilunsad sa Department of Tourism (DOT) ang bag-ong tourism slogan nga “Love the Philippines” nga giingon nga magsilbing guidepost sa dali nga pagbangon sa industriya sa turismo. Tinuod nga ang brand enhancement kinahanglanon aron magpabilin ang atong industriya sa turismo nga competitive ug relevant. Dili kay slogan lang ang makapa-agni sa mga turista. Kinahanglan ang atong polisiya, inprastructura, ug sistema nga ipatuman nga walay anomaliya, mohaum sa “gugma” nga gisaysay sa maong slogan. Kay kon dili magtakdo, maigo kita sa pagya-komedya nga, “Bisan hinganlan pa nimo’g kaldereta ang imong baligya nga humba nga baboy, dili gayod kini mahalin ngadto sa atong mga kaigsoonan nga Muslim.” Madahaan!

Wala matukma

Sa susamang balita, ang kanhi Population Commission (POPCOM) mopaubos na usab og rebranding sa ilang buhatan ug pagatawgon na kini’g Commission on Population and Development. Ang rebranded nga buhatan (CPD) mopunting sa pag-implementar sa Philippined Population and Development Plan of Action 2023- 2028. Dili kaayo nato makita ni masabtan kon ang pag-ilis sa ngalan sa buhatan aduna ba’y ikatampo sa pagsulbad sa nagkadako nga populasyon sa nasud. Mura’g haum ni’ng kalakiha ang panahom nga “Nabalaka lage kitang tanan sa pagdako sa populasyon apan wala kita mabalaka niini sa tukma nga higayon.” Muleeeng!

Pilia ang ‘Least Evil’

Gideklarar sa Korte Suprema nga ‘unconstitutional’ ang balaod nga nag-oktaba sa Barangay og Sangguniang Kabataan elections (BSKE) ngadto sa katapusan’g Lunes sa Oktobre 2023 gikan sa nahauna niini nga schedule niadto’ng Disyembre 5, 2022. Gitamod hinoon sa Labaw’ng Hukmanan ang legal nga praktikalidad ug panginahanglan sa pagpahigayon na lang sa BSKE karong Oktobre 30 subay sa gitawag nga “operative fact doctrine.” Daghan na ang mipadayag sa ilang katuyoan nga modagan karong eleksiyon bisan dili unta angayan. Tambag nato sa mga botante, “Ayaw pili-a ang labing maayong kandidato (kay wala man gayod kini), hinonoa, pili-a kadtong makahimo lang og diyotay’ng kadaut.” Ateeerrr!

Wala na’y Lechon?

Gisaway sa Commission on Audit ang lokal nga kagamhanan sa Liloan, Cebu tungod sa giingon’g pag-gasto niini og mokabat P 1.357 million nga kantidad aron ipalit og lechon alang sa ilang mga kalihokan. Giisip sa COA ang maong galastohan nga irregular ug wala kinahanglana. Kon pauyonan ang maong obserbasyon sa COA, nagpasabot ba kini nga mahanaw na ang lechon sa mga salo-salo o kalihokan sa kagamhanan? Matud pa sa akong amigo, “Bantay bitaw’g mo-order pud ang COA og lechon kon naa sila’y okasyon.” Hala no?

Naay bugas, walay sud-an

Matud pa ni DA USec. Leo Sebastian, adunay igo nga suplay sa bugas alang sa panginahanglan sa katawhan inig sugod sa 3rd quarter karon tuiga. Kini tungod sa mabungahon’g ani sa gitanon sa nangagi’ng buwan sa Enero ngadto sa Hunyo. Makalipay ang maong balita alang sa mga yanong lumolupyo. Abunda na man kaha ang bugas, sud-an na lang ang ilang problemahon, Trending na unya ang pagya nga “Imong sud-an, akong kan-on.” Pagkatoytoy!