EDITORYAL - Unsay mahimo pagwagtang sa libud-suroy

Ang Cebu City naninguha gyud nga ma-Singapore-like ang dagway niini. Mao nga gipangusgan gyud niini ang nag-unang makitang salawayon diha sa kadalanan. Ang basura, vandals ug kining mga libudsuroy.

Sa basura ug vandals duna nay kausaban nga nakita tungod kay dunay mga magbalantay nga nakatutok sa mga partikular nga dapit.

Apan dili gyud sa tanan kay duna pa gihapoy mga suok-suok sa kabarnagayan nga daghan gihapong basura ug mga vandals bisan asa. Responsibilidad kini sa mga hingtungdang barangay nga palihukon ilang mga sakop aron paninduton ilang dapit.

Sa kabahin sa mga libudsuroy, dili na kaayo sila makita sa adlawan diha sa kadalanan, apan ini og lawom sa kagabhion, naa ang uban mangligdas sa mga aseras sa karsada nga maghapin og karon ug tabon-tabon nga sako. Duna say uban nga naa sa ilawom sa mga taytayan.

Nabantayan sab hinuon nga sa Cebu City nimenus ang mga magpakilimos ug magtambol-tambol diha sa karsada aron mangayo-kayo og sensilyo sa mga pasahero.

Sila kadtong mga sakop sa Badjao community nga ang uban magtangkil-tangkil sa sa ilang mga gagmay nga mga anak samtang nagpakilimos bisan sa kainit sa adlaw.

Apan wala na tuod sila magpakilimos sa kadalanan sa Cebu City , apan naa na sila karon makita sa mga eskina sa mga dagkong dalan sa Mandaue City ug sa Lapu-Lapu City.  Bitbit ilang mga anak ug mga tambol diha sa karsada mangayo og limos.

Kang kinsa mang responsibilidad kining mga libud-suroy? Sa lokal lang ba nga kagamhanan o dunay dakong papel ang mga nasudnong ahensiya sama sa Department of Social Welfare and Development (DSWD)?

Pwede ra man i-apply kanila ang mga lokal nga ordinansa sama sa Anti-Mendicancy Ordinance ug uban pa aron mapitol.

Apan sa samang paagi, tungod kay wala man silay laing nahibaw-ang panginabuhian, kinahanglang tabangan sila sa barangay officials diin sila nagpuyo aron tudloan og panginabuhian ug tabangan sab nga makakita og trabaho aron di na mamalik sa karsada.

Kay bisan makapila pa sila hipuson kun wala silay laing nahibaw-ang pamaagi nga panginabuhian aron masudlan ilang tiyan ug ilang mga pamilya, magbalik-balik ug magbalhin-balhin ra sila og rumbohon nga lugar aron didto makilimos.