Kinsa ang nagsulti sa tinuod

Human miboto ang balita nga ilisan sa iyang pagka chairman sa Board of Directors si Atty. Joey Daluz, ako dayon nga nasayran nga ang rason sa paghulip sa abogado mao ang iyang pagsupak sa laraw ni Mayor Mike Rama sa paghimong pribado sa Metro Cebu Water District (MCWD).

Ang detalye sa paghimong pribado sa MCWD akong nahibawan apan wala nako ibutyag ang pangalan sa naghatag nako niini sa akong programa sa radyo ug lindog ning maong pamantalaan agi og pagtamod sa iyang hangyo nga dili nako ibulgar ang iyang pangalan.

Karon, si Jodelyn May Seno nga sakop sa MCWD Board ang mibulgar sa nahitabong tigum nga gipatawag ni Mayor Mike Rama sa iyang panimalay sa may Espina Village sa Dalan B. Rodriguez sa mga sakop sa board diin anaa usab sa maong tigum ang presidente sa Prime Water Infrastructure Corporation nga si Fe Rebancos niadtong Pebrero 16 ning tuiga. Ang Prime Water gipanag-iya sa Villar Groups.

Si Seno mibutyag nga gipatawag ang board alang sa usa ka breakfast meeting sa mayor aron paminawon ang usa ka bisita sa maong meeting. Apan wala makatambong sa maong tigum si Atty. Joey Daluz ug Engr. Mike Pato.

Human mirehistro sa ilang pagsupak ang board sa paghimong pribado sa MCWD, ang mayor mipatawag og laing tigum niadtong miaging buwan nga miresulta sa pagtangtang ni Daluz ug sa pagbutang ni Engr. Mike Pato isip bagong chairman sa MCWD Board.

Sa dihang gikuhaan sa iyang habig, si Mayor Mike Rama nanghimakak sa pasangil nga siya ang nagpaluyo sa paghimong pribado sa MCWD. Karon kinsa man ang nagsulti sa tinuod? Si Mike o si Seno.

Sa laing bahin, nganong himoon man nga pribado ang MCWD? Kun himoong pribado ang MCWD, mokosug na ba ang agas sa tubig? Dili ba motaas ang bayronon nato sa tubig? Pabor ba sa mga konsumedor ang pagpribado sa MCWD? Kun maayo ang pagpribado sa MCWD nganong molimod man ang mayor nga siya ang nagpaluyo sa plano? Dili ba siya segurado niini?