Di sulbad sa kakuwang

Dugay na'ng problema sa Pilipinas ang kakuwang og mga health professionals labi pa gyud sa mga nurse.

Dinhi sa Sugbo ang ubang mga hospital napugos pagsira sa ubang bahin sa ilang tambalanan kay kuwang ang gidaghanon sa mga nurse.

Gilimitahan ang gidaghanon sa mga pasyente nga dawaton bisan nanobra ang ilang mga kwarto tungod kay way nurse nga makaatiman.

Pero ngano ba nga naproblema man ta og nurse nga nagsugwak man ang mga tunghaan sa nursing? Hain man diay paingon ang liboan nga mogradwar ug makapasar sa licensure exams kada tuig?

Ang subo nga sitwasyon sa atong nasud mao nga sagad sa mga nahabilin nga mga nurse karon nagpaabot lang og igong experience aron molangyaw.

Ang mga batid ug experienced nurses tua sa mga langyaw nga tambalanan nanarbaho tungod sa tataw nga hinungdan--dakong sweldo ug maayong benepisyo.

Ang uban nga mga nurse nga di gustong molangyaw wala sab magpraktis sa ilang propesyon tungod gihapon sa maong hinungdan. Mas dagko og sweldo ang call center kay sa tambalanan nga mas risgo ang trabaho.

Sweldo ug benepisyo maoy ugat sa problema nganong nagkuwang ang Pilipinas og mga nurse.

Apan inay pangitaan og paagi ang maong problema aron mapugngan ang padayong pagpanglangyaw sa atong mga nurse, ang solusyon sa bag-ong health secretary nga si Teodoro Herbosa mao nga hatagan og temporaryong lisensiya ang mga nahagbong sa pasulit nga mga nursing graduates.

Sigun sa sugyot ni Herbosa, kadtong mga nahagbong apan dunay score nga 70% hangtud sa 74% mahimo kuno nga tugotan nga magpraktis sa ilang propesyon pinaagi sa paghatag nila og temporaryo nga lisensiya.

Akong pangutana ni Herbosa, mosugot siya nga ang dunay temporaryong lisensiya maoy moatiman ug mang-injection niya?

Kun temporaryo ang lisensiya, buot ipasabot nga dili pa sila hingpit nga mga nurse. Sa ato pa limitado ang ilang mahimong buhaton ug dili nila mahimo ang tanang gimbuhaton sa usa ka nurse. Kun mao, tataw nga di ni maoy sulbad sa problema.

Gani posible pa nga maghatag ni og mas seryosong problema sa umaabot. Hinaot misantop sa utok ni Herbosa nga kaluwasan sa mga pasyente ang buot niyang isakripisyo.