Himoong legal ang habal-habal

Mipagawas og Executive Order Numero 8 si Cebu City Mayor Michael L. Rama nga nag umol sa Cebu City Habal-habal Drivers’ Coordinatng Office (CCHCO), nga gitanaw nga mag-formalize ug mag-regulate sa habal-habal nga matang sa transportasyon sa siyudad sa Sugbo

Ang gobiyerno sa siyudad sa Sugbo nasayod sa habal-habal nga nagtanyag og sakay isip matang sa transportasyon.

Ang siyudad sa Sugbo miila sa kahimtang ug nagpakabana sa mga sumasakay pinaagi sa pagpakigalayon sa mga transportasyon nga nagdagan sulod sa ilang hurisdiksiyon, matud pa sa EO sa Mayor.

Section 2 sa EO nagkanayon nga ang CCHCO moseguro sa seguridad sa mga pasahero nga mi-patronized sa habal-habal isip matang sa transportasyon pinaagi sa pag-regulate sa serbisyo sa habal-habal drivers nga namasehero sa dakbayan sa Sugbo.

Ang mga habal-habal drivers basi sa E.O. mao kadtong mga nagpuyo ug rehistradong botante sa dakbayan sa Sugbo nga naghupot og driver’s license nga giisyu sa Land Transportation Office (LTO) ug rehistrado ang motorsiklo.

Mas maayo gayod nga ma-regulate ang operasyon sa habal-habal tungod kay dili ikalimod nga daghan na gayud sila dili lamang dinhi sa dakbayan sa Sugbo kun dili sa lukop nasud usab.

Sa pag-regulate sa habal-habal malikayan ang dagko nga pangayo sa habal-habal driver ngadto sa ilang mga pasahero. Gawas niini, mahatagan usab og seguridad ang mga pasahero ug habal-habal driver sa posibling krimen nga mahitabo.

Dinhi dili na makapamasahero ang mga dili lisensiyado nga driver ug makadagan ang mga motorsiklo nga paso na ang rehistro.

Ang mga krimenal nga magpakaaron-ingnon nga habal-habal driver maminusan kun dili man mawagtang.

Ang mga habal-habal driver nga nag- ideline sa pagpamaligya og ginadili nga drugas magpanagana na usab sa pagpadayon sa illegal nilang kalihokan tungod kay sayon na lamang kaayo sila nga masubay sa kapolisan.

Maayo unta og masugdan na dayon ang trabaho sa umulon nga Cebu City Habal-habal Drivers’ Coordinating Office.