Gihuaw ako

Sunodsunod ang mga krimen nga nahitabo sa atong nasud. Mga kriminal mora’g wala nay kahadlok mopusil-patay sa ilang gustong patyon bisan anaa pa kini sulod sa ilang panimalay.        

Dili kay karon lamang kini nahitabo. Kadaghan na. Busa, makaalarma na kaayo sa katawhan.

Usag-usa makapangutana: “Asa bang dapita sa Pilipinas ang angay puy-an, diin maseguro ang kaluwas sa pagpuyo, kon ultimo si Negros Oriental Governor Roel Degamo, kinsa may kapolisan pirmeng nagbantay, gisayonsayon  gihapon sa pagrakrak-patay  sulod mismo sa iyang kaugalingong house compound?”

Sa miaging Domingo, Marso 12, diin ang ebangheliyo nagpahinumdom nga human sa subsob nga pagsangyaw ni Hesus sa mga Maayong Balita ngadto sa katawhan, isip tawo, nakasinati usab Siyag kaluya gumikan sa kataas sa Iyang panaw, busa gibatig kauhaw.

Milingkod tupad sa atabay ug pagkakita Niya sa Samariyanhong babaye nga nagdalag tibod aron magkalos og tubig, Siya mihangyo: “Paimna ra ko!”

Pero imbes paimnon, gisudyaan hinuon siya sa babaye: “Hudiyo ka ug ako Samariyanhon. Busa, nganong nangayo ka man nakog tubig nga mainom?” (Kaniadto man god, ang mga Hudiyo ug Samariyanhon managlahig tinuohan. Walay pagsinandurotay.)

Ug mao kini atong makita sa politikanong situwasiyon sa Negros Oriental sa magkaatbang nga partido: Degamo ug Teves, kinsa dili gyod magkasinandurotay.

Kay samtang giuhaw ang katawhan sa kalinaw ug hustisyang patas nga mao poy gipangayo ni anhing Gob. Degamo gikan sa mga Teves, sama sa babayeng Samariyanhon, daw gitubag ra sa kaatbang ang gobernador og: “Nganong paimnon man tamo, nga kontra man ta?”

Ug subo kaayong palandungo. Kay kon si Hesus, atong Manunubos nga giuhaw, gipatay-lansang sa krus sa mga Hudeyo, ang giuhawng Gob. Degamo uban sa laing mga Negrosanong gipang-uhaw, girakrakan-pamatay sab sa mga armadong killer.

Angay hinumdoman. Kon unsay gibuhat nato ngadto sa atong isig ka ingon, mao usab kini ang gibuhat nato ngadto sa Ginoo.

Diin, pag-abot unya sa adlaw sa paghukom, Iya tang sudyaan: “Dihang giuhaw Ako, wala Ko nimo paimna.”

Ug sa mga panid sa Bibliya, tataw kaayo asang dapita Niya itambog ang tawo, kinsa sa buhi pa, wala mopainom Kaniya dihang Siya giuhaw.

Unta, samtang dili pa ulahi tanan, makat-on na kita sa pagpainom og espirituhanong tubig sa mga gipang-uhaw