Anananggal?

Di gyud ko motuo nianang mga tabi-tabi nga may nakit-an nga wakwak, o “anananggal” diha sa Barangay Dumlog, Talisay City.

Ang termino nga anananggal, nagpasabot kuno kini nga babayeng ungo nga kon mobiktima na og tawo, maputol ang iyang lawas ug makalupad ang dapit sa ibabaw.

Nakadungog na ko niini dihang bata pa ko ug kini maoy sagad ipanghadlok sa mga ginikanan ngadto sa ilang mga anak aron nga inigka gabii na, dili na mogawas sa balay.

Hadlokon dayon nga naay anananggal, wakwak, ungo ug unsa pa na diha nga pagpanghadlok. Nagdako gyud ko sa probinsiya ug sukad, wa gyud ko kakita’g anananggal o wakwak.

Aw hinuon, nakadungog ko nga panahon sa gabii, dunay magwakwak diha sa palibot sa among balay kaniadto, ug maoy nakapahugot sa pagtoo sa uban nga duna gyuy wakwak.

Diha’y higayon nga molakaw ko nga ako ra usa agi sa mga katubhan ug kalibonan, apan wa gyud ko duola og anananggal. Samtang naglakaw nuon ko, may nadunggan ko nga nagwakwak.

Apan pwera buyag, isog-isog ko nga nagsalig sa hait kaayo nakong sundang nga gigunitan nako pirmi basta maglakaw sa gabii. 

Dihang midako na ko, nakaingon ko nga estorya lang gyud tingali ang giingon nga wakwak, ungo, kun “witch” sa eninglis. Sa miaging adlaw, nagubot ang taga Dumlog, Talisay kay may nakakita kuno’g anananggal sa ilang lugar!   

Nakit-an kuno sa duha ka bata ang “anananggal” nga nagtungtong sa atop sa usa ka balay, nagsul-ob ug itom nga sinena, ug siga’g mata.

Nakapahiyom ko kay giimbestigar kuno karon sa kapolisan kining maong tabitabi. Gani, may ilado kaayo nga TV personality gikan sa Manila moanhi kuno aron pagsusi niini.

Kon tinuod nga dunay anananggal, unya makabasa kini niining akong lindog, aria kuno ko bi aron makatuo gyud ko nga dunay anananggal.

* * *

Nahinumdom ko sa nakit-an nako sa YouTube nga pwerteng nakadagan sa usa ka tawo kay samtang naglakaw siya, nakakita siya’g nawong sa tawo nga gisul-oban og panapton nga itom, ug naglupad ni nga nagpaingon kaniya.

Nagtuo gyud tuod siya nga usa na kadto ka anananggal, apan diay ang tinuod, gibitay ra kadto sa usa ka “drone” nga duna say tingog nga nagwakwak. Hahaha.

 Ang tawo nga maoy nagpalupad sa drone pwerteng nakaagik-ik nga nagtan-aw sa mga tawo nga iyang gihadlok ug gikuhaan og mga hulagway nga iyang gi-upload sa YouTube.

Resulta, dako kaayo siya og nakwarta kay daghan man ang mahimuot nga mitan-aw. Dili kaha ingon niini ang nahitabo diha sa Dumlog, Talisay?