Angay pa nga mag-mask

Miluag na gayud ang mga restriksiyon nga gipahamtang sa kagamhanan batok sa COVID-19 tungod sa rason nga nagkahinay na ang tinakdanay sa maong makamatay nga balatian dinhi sa nasud.

Sa mga tulonghaan, pangpubliko man o pribado, mibalik na ang face-to-face classes sa tanang level. Apan adunay nagpabilin pa sa blended learning karong school year tungod sa ka dako sa ilang populasyon.

Hinuon sa kinatibuk-an, voluntary na ang paggamit sa facemask gawas sa mga panimalay. Apan discretion na lamang hinuon sa mga establisimento kon mopasulod ba sila niadtong mga wala nag-mask.

Kining mao nga kalamboan resulta sa paningkamot sa nasyonal nga kagamhanan nga mobalik na kita sa naandang bulohaton aron usab sa pagbangon sa ekonomiya nga grabe nga nalugmok tungod sa pag-arangkada sa pandemiya.

Gani kita dinhi sa Sugbo ang nag-una sa pagsagop sa boluntaryo na nga pagsul-ob sa facemask. Hagbay ra nga nag-isyu og order ang atong mga opisyal dinhi nga puwede na nga dili mag-facemask sa gawas sa panimalay. Apan bisan pa man niining maong kalamboan, padayong mipahimangno ang kadagkoan sa Department of Health ngadto sa katawhan nga magbinantayon pa gihapon batok sa coronavirus disease.

Matud nila nga padayon pa ang dakong hulga sa COVD-19 ug nga dili angay mokumpiyansa ang matag usa. Mao nang nanawagan ang maong ahensiya sa katawhan sa padayong pagsul-ob sa facemask.

Hinuon, adunay punto usab ang DOH. Ania pa sa atong palibot ang maong virus ug nga gikinahanglan pa gihapon ang pag-amping sa matag usa. Mao nang angay pa gihapong mag-facemask kon anaa sa lugar nga daghang tawo.