Nahisama’g ‘Country Club”

Giangkon ni Senate Minority Leader Koko Pimentel III nga nasayop sila sa paglugak sa mga rekisitos sa pagpasakop sa partido’ng PDP-Laban sa dihang midaug na si Duterte pagka-presidente niadtong 2016.

Nahisama na lang karon sa usa ka country club ang PDP-Laban diin ang mga sakop niini nagkuyog na lang tungod sa nahuptan nga gahum ug wala na’y pagtagad sa mga mithi ug baruganan sa partido.

Tinuod nga ang politika abilidad sa paghimo sa imong personal nga interest nga usa ka nasudnong interest.

Haum ang pagya nga, “Adunay politiko nga mag-ilis og partido tungod sa prinsipyo apan daghan usab ang mag-ilis og prinsipyo tungod sa  partido”.  Fezteleeern!

Malipay bisan lunes

Agi’g tubag sa panawagan ni Bise Presidente ug Education Secretary Sara Duterte sa mga magpapatigayon nga hatagan og oportunidad nga patrabahoon ang mga K-12 graduates, namahayag usab si Go Negosyo founder Joey Concepcion 3rd nga dili mahimong manduan ang pribadong sektor ug nga anaa kanila ang desisyon kon modawat ba sila’g dugang empleyado.

Taas ang unemployment rate sa atong nasud. Apan dili kini tungod lamang sa kakulang sa trabaho kon dili daghan ang tapulan manarbaho.  Sila kadtong kanunay’ng malipayon bisan adlaw nga Lunes.  Muleeeng!

Weekends maoy sulbad

Alang kang Senador Koko Pimentel, adunay pito (7) ka isyu o suliran  sa nasud nga angayan tutokan sa administrasyon ni Presidente Marcos, Jr, nga iyang gihulagway ginamit ang mga vowels o bokales nga “AEIOU”, isip mnemonic device, nga nagrepresentar sa mga suliran sa agriculture, economy, education, energy, inflation, obra or work ug utang (debt).

Daghan pa ang suliran sa nasud nga, kon atong hisgutan tanan, dili tingale paigo ang tanan’g letra sa alphabet.  Sugyot sa akong amigo, “Aron masulbad ang problema sa nasud, maayo pa’g ideklarar sa Presidente nga ang mga adlaw sa semana pulos na lang Biyernes, Sabado, ug Domingo”. Pagkatoytoy!

Dili magmada-ugon

Segun sa resulta sa Consumer Pulse Survey nga gipahigayon sa TransUnion Philippines, nasutâ nga 54% sa mga Pinoy nagtoo nga mahinungdanon gihapon ang pagpangutang aron makab-ot  ang ilang mga financial goals ug aron masagubang nila ang mga kalisod nga dala sa inflation.  Matud pa sa katigulangan, “walay utangan nga nagmadaugon”. Kay ginaingon baya nga “ang pagsulbad sa problema sa utang, pinaagi sa dugang pa nga pagpangutang, sama ra sa nagsugo ka sa hanggaw…walay katumanan”.  Madahaaan!

Mag-stock daan

Sumala sa Philippine Statistics Authority, ang kantidad sa kadaut gumikan sa mga katalagman nga mi-igo sa nasud sa miaging tuig mikabat ngadto sa P 60.68 bilyones ka pesos.

Daghan na ang programa ug nagsige lang gahin og pundo ang kagamhanan nga nagtumong sa disaster resiliency, apan wala gihapon mokunhod ang kadaut nga masinati sa katalagman.

Bisan pa man, ang pagpangandam mao ra gihapon ang mahinungdanong sangkap sa pag-atubang sa katalagman.  Matud pa bitaw sa akong higala, “dili kinahanglan nga moabot na ang katalagman una pa ako mag-stock ug bino sa akong balay”. Fishkots!