EDITORYAL - Paigo ba kaha ang classrooms sa F2F?

Usa ka dakong hagit sa gobiyerno partikular sa DepEd ang umaabot nga face to face classes para sa mga tinun-an karong sunod buwan human sa duha ka tuig nga wala pagpatungha personal sa mga tinun-an diha sa mga tunghaan ug gihimo ang blended learning tungod sa pandemiya sa Covid-19.

Apan dili lang ang Covid-19 ang nagdala og problema, ang bagyong Odette dinhi sa Kabisay-an miguba og daghang mga lawak-saringan sa nagkalain-laing probinsiya.

Gani duna pay daghang mga public schools ang wala pa gyud makapaayo sa ilang mga atop nga giwalis sa bagyong Odette niadtong Disyembre 26,2021.

Ang labing dakong hagit mao ang pagpmentinar sa health protocols ini og sugod na og balik sa klase. Base sa gidaghanon sa mga tinun-an nga matag tuig mosaka, sigurado gyud nga magkuwang na sab ang mga lawak-saringan.

Gani sa wala pay pandemic, duna gyuy shortage sa pirme sa mga lawak-saringan sa public schools, wala pa kadtong one-meter distance o social distancing.

Sa kaniadto naandang klase, ang matag lawak makapasulod og 40-50 ka mga tinun-an, apan kuwangon gyud pirme ang mga lawak, gani ang uban anha na sa ilawom sa punoan sa kahoy o ba kaha sa mga covered courts magklase.

Karong bag-ohay pang nahuman ang pandemiya unsa nalang kaha nga dili man kaha pwede ang magsikit? Tungod sa estriktong health protocols nga kinahanglang sundon, mahimong bahinon ang klase sa naandang 40-50 ka bata matag lawak ug pun-an ang number of schools days aron pagsigurong tanang mga bata makakompleto sa mga adlaw sa klaseo apan motaas-taas ang school year.

O ba kaha, ibalik nalang ang naandanng gidaghanon sa mga bata basta higpitan lang ang health protocols ug kinahanglang bakunado ug may booster shots ang tanan aron protektado tanang motungha.

Apan unsaon nalang kadtong wala o dili gyud magpabakuna tungod sa relihiyon, tinuohan, dunay comorbidities ug uban pa, hikawan ba sila og edukasyon?