Unang SONA

Sa unang higayon moatubang si Presidente Ferdinand “Bongbong” Marcos, Jr. sa Kongreso ugma isip pangulo sa nasud alang sa iyang labing unang State of the Nation Address (SONA). Sa maong higayon sayran niya ang publiko pinaagi sa mga representante niini didto sa kamarabaha sa direksiyon sa iyang gobiyerno sa mosunod nga unom ka tuig.

Diha sa SONA masayran sa katawhan ang iyang mga plano ug programa alang sa nasud.

Masayran sab unya sa publiko unsay iyang prayoridad nga magkinahanglan og suporta sa Kongreso pinaagi sa pagpanday og mga balaod. Tingali mao ni unang higayon nga ipahibawo ni PBBM sa katawhan ang detalye sa iyang mga plano alang sa nasud nga wala niya mahimo panahon sa kampanya.

Kun nahinumdom pa mo lihay siya sa mga debate ug tihik sa paghatag og detalye sa iyang mga plano gawas lang sa pagbalikbalik nga “unity” ang solusyon sa tanang gumunhap nga atong giatubang.

Kabahin kadto sa ilang paagi sa kampanya ug dili nato mahimong pugson siya nga moatubang sa debate ug iladlad ang mga detalye sa iyang plano atol sa maong higayon.

Apan karon nga human na ang eleksiyon ug naangkon na niya ang makabungog nga mayoriya, obligado na ang presidente nga ipahibawo sa katawhan unsay direksiyon sa iyang administrasyon.

Dili pa ta kapaningil sa iyang mga saad tungod kay mao pay pagsugod sa iyang gobyerno, apan importante nga masayod ta sa iyang mga plano.

Sigun hinuon sa pahibawo sa Malakanyang, bisan wa pay detalye, apan gipaabot nga pahimug-atan sa presidente ang mga programa unsaon nga hingpit makalingkawas ang nasud sa krisis nga mugna sa pandemya.

Gipaabot sab ang mas detalyadong pahibawo sa presidente sa iyang mga plano mahitungod sa agrikultura nga iyang gipangunayan sa pagpangulo.

Pipila lang ni sa mga punto nga gipaabot nga diskutihon sa presidente ugma.

Mamahimong ang ubang mga plano nga ipahibawo sa presidente ugma dili mauyonan sa uban. Posibling dunay mga sektor nga di makontento ug magbagulbol nga nalimtan sa presidente paglakip sa iyang mga plano.

Apan atong hinumduman nga mas lapad ug dako ang problemang iyang giatubang sa tibuok nasud kay sa personal natong mga problema.

Busa angayang suportahan ang presidente sa iyang mga plano ug direksiyon sa mosunod nga unom ka tuig.