Nagkadako nga burukrasya

Tun-an pag-ayo sa Civil Service Commission (CSC) ang giproponer nga rightsizing sa burukrasya nga mahimong makaapektar sa 2 ka milyon ka empleyado.  Ubos sa maong lakang, adunay 187 ka buhatan ang repasohon kabahin sa ilang gimbuhaton nga giingon’g redunadant o ba kaha nag-overlap sa ubang ahensiya.  Maaniindot ang katuyoan sa maong lakang apan giangkon na daan ni VP Sara Duterte-Carpio nga malisod kini ipatuman.  Sa kahimtang sa Pilipinas,, nagkadako ug milubo na ang burukrasya sa tuyo nga matubag nga panginahanglan sa nagkadakong burukrasya.  Tuyok-tuyok ra!

Bayran aron mahilom

Tungod kay wala ma’y aksyon ang China sa hangyo sa kanhi administrasyon nga magpahuwam og pundo alang sa tulo ka dagko’ng railway projects, giisip na kini nga gibakwi na ug mahimo na nga i-renegotiate sa bag-ong administrasyon.  Adunay kaayohan ang wala pagpa-utang sa China kay wala na madugangi ang nagkadako na nga utang sa Pilipinas. Ginaingon baya nga “ang nasud mawad-an sa iyang kagawasnon ug ka-anyag kon gipundar kini sa utang”.  Makapahinumdum sa akong higala nga gisapot kay sigehan og paningil sa iyang utang.  Ang iyang solusyon: Bayran ko na bitaw, dah, nahilom lage”.  Pagkatoytoy!

Mosuporta unta ang gobiyerno

Gibanabana sa United Nations nga ang populasyon sa tibuok kalibotan moabot na sa 8 billion karon Nobiyembre 15. Giingon usab nga katunga sa gibanabana nga pagdaghan sa populasyon karong 2050 anaa mahimutang sa walo lamang ka nasud diin nalakip niini ang Pilipinas.  Hulga sa atong paglahutay sa pagkinabuhi ang paglubo sa populasyon.  Ang nakaparat lang kay samtang nabalaka tinuod kita sa populasyon, wala kita magdungan og kabalaka.  Matud pa sa akong higala, “Nisuporta man ko sa programa sa pag-kontrol sa populasyon, hinaut nga ang gobyerno mosuporta usab”.  Madahaan!

Kahulogan sa MCWD

Mianunsyo ang Metropolitan Cebu Water District (MCWD) nga kulang ang ilang suplay sa tubig nga mokabat sa 330 milyon ka litro o 330,000 ka metro kubiko matag adlaw aron pagtubag sa panginahanglan sa ilang mga konsumidor.  Kon mahinumduman, gihulipan ang kanhi mga miyembro sa MCWD Board sa kasamtangang mga miyembro gumikan kay wala sila makasulbad sa suliran sa kakulang sa tubig.  Kon mao gihapon ang kahimtang, wala diay molampos ang kasamtangang opisyal pagwagtang sa pagya mahitungod sa kahulogan sa MCWD nga “Moagas C(K)adiyot, Wagtang Dayon”.  Paleho la!

Taripa na ang gipunting

Sa may kalambigitang balita, naglaraw ang MCWD nga patas-an ang ilang water tariff sugod karong Hulyo 1, 2023 sa tuyo nga masustenihan ang ilang operasyon.  Mahinumduman nga ang katapusang pagpasaka sa MCWD sa taripa sa tubig kaniadto pa’ng Enero 1, 2015.  Pagsugod sa ilang pagpangatungdanan, gipunting gilayon sa MCWD Board ang pagpadaghan sa tinubdan sa tubig apan kay wala man nila maigo, ang taripa na lang ang ilang gitira karon.  Ginaingon nga “ang TALENTO maka-igo sa target nga wala maigo sa uban; ang pagka-HENYO makaigo sa target nga dili makita sa uban”.  Kulang ba kaha sa talento ang namunoan? Nangutana lang!