Divorce bill ni Padilla

Sa tibuok kalibotan ang Pilipinas ug Vatican City na lamang ang wala moila sa divorce. Samtang sa Social Weather Stations (SWS) survey nga ilang gihimo niadtong tuig 2017 nasuta nga 53 porsiyento sa mga Pinoy nga magtiayon ang mipabor sa divorce alang niadtong dili na gayod mahilot nga kasungian.

Mao ni ang gibasihan ni Senador Robin Padilla sa iyang giduso nga divorce bill sa Senado. Ang senador mipasabot ngadto sa mga wala makauyon sa balaudnon nga iyang gipalabang nga ang tumong niini dili aron bungkagon ang kaminyoon ug pamilya kun dili aron sa ingon palig-onon kini.

Ang divorce usa ka legal nga paagi sa pagputol sa kaminyoon pinaagi sa hukmanan. Sa Pilipinas ang kapariha sa divorce mao ang annulment of marriage.

Ang nakalahi lang sa annulment of marriage, istrikto ug lisod kini nga kab-oton kun itandi sa divorce nga medyo sayon ran ga kab-oton.

May punto si Padilla sa iyang giduso nga divorce bill. Kay sa pagkatinuod wala nay pulos ang pagpadayon sa pagpuyo uban sa imong asawa o bana nga dili na nimo ikasabot. Apan walay kasungian nga dili mahilot kun dili lang ipatigbabaw ang garbo sa asawa ug bana. Mao kini ang usa sa mga rason ngano nga anaa ang legal separation diin ang magtiayon gitugotan nga magbuwag sa pagkatulog ug pagkaon apan wala putla ang ilang relasyon sa kaminyoon. Kini tungod sa pagtuo nga aduna pay kahigayonan nga magkauli pa ang maayong relasyon sa magtiayon.

Ang 1987 nga Konstitusyon sa Pilipinas nanalipod sa ka sagrado sa kaminyoon ug pamilya. Ang Konstitusyon miila sa kaminyoon nga pundasyon sa pamilya ug ang pamilya giila kini nga pundasyon sa nasud busa kinahanglan kining palig-onon ug dili pahinayon.

Mas maayo seguro nga timbang-timbangon ni Padilla ang epekto sa iyang gipalabang nga balaudnon. Asa man ang palabihon sa senador? Mapalig-on ang nasud o panalipdan ang kaminyoon ug pamilya sigun sa iyang pangangkon.