EDITORYAL - Kinsay maayong pilion

Trese ka adlaw nalang ug mopili na pagusab ang katawhan og bag-ong mga modumala sa panggobiyerno sa nasud. Ang kaugmaon sa nasud sa mosunod nga unom ka tuig naa sa mga kamot sa mga botante nianang adlawa.

Dili unta magtinapolan ang mga botante sa pag-research kun kinsa sa mga kandidato sa lokal ug nasudnong posisyon ang angayang padag-on.

Pilia kadtong mga kandidato nga dunay klarong plataporma, dili pulos lang estorya nga walay kahulogan.

Wala kinahanglana sa mga Pilipino karon ang puro lang estorya nga mga panaad. Ilabi na kun kini dili kini klaro o hanap kaayo og kahulogan.

Kanang mga saad nga gustong ipausab ang kinaiya sa mga Pilipino dili kana maoy makahaw-as sa Pilipinas, imposible kini mahitabo kay kaniadto pa kinaiya naman kini sa mga tawo. Kanang magsige lang og panawagan nga kinahanglang mag-ingon ani ang mga Pilipino kun siyay modaog, lisud nang buhaton. Dili kana plataporma. Kay sa ato pa kun dili kini buhaton sa mga Pilipino dili sab siya makahimo og unsay makaayo sa Pilipinas?

Ang gikinahanglang botaran ug padag-on mao kadtong kandidato nga duna gyuy klarong plataporma, dunay gustong buhaton, usbon, palambuon, pun-an para sa dugang kaayohan sa tanan.

Pila ka dekada nang nagpabilin ang Pilipinas sa grupo sa mga gitawag og “third world countries.” Nahurot-hurot na gani ang natural resources niini ug nalubong nasab sa utang, apan hangtud karon nagpabilin ang estado niini.

Dili kahunat aron makalingkawas tungod sa kinaiya sa mga botante nga mopili og mga lider nga kuwang og abilidad basta sikat lang.

Ang bugtong makapahaw-as sa Pilipinas mao ang ekonomiya niini. Ang angay padag-on nga lider kadtong dunay kahibalo sa ekonomiya, duna nay track record bahin niini, duna nay gihan-ay nga formula kun unsaon, dunay maayong background nga mosalig ang mga langyaw nga investors pagbubo og puhonan dinhi.

Kun ang lider makadani og daghang investors, daghan ang makatrabaho. Kun daghan ang makatrabaho molambo ang tanang matang sa negosyo gikan sa dagko hangtud na sa mga street vendors, modako sab ang koleksyon sa buhis ug dunay magamit ang gobiyerno sa mga proyekto ug programa niini para sa katawhan.