EDITORYAL - Paggamit sa kahimanan sa gobiyerno

Daghang nakasaway nga mga Sugbuanon sa garapal na kaayong paggamit sa mga makinarya sa gobiyerno sa pagpangampanya sa ilang kandidatora o ba kaha sa ilang gisuportahang kandidato sa nasudnong piniliay.

Gawas sa paggamit sa mga sakyanan sa gobiyerno, gawas lang sa mga ambulansiya ug emergency vehicles, gigamit sab ang pipila ka mga kawani sa mga nagkalain-laing local government units o government agencies nga direkta o dili direktang pagsuporta sa partikular nga kalihokan sa kandidato o partido.

Duna say uban nga dili direkta nga nangita og paagi aron lisud-lisuron ang mga kandidato sa oposisyon.

Samtang tuod gidili kini sa Omnibus Election Code ug dunay pasidaan nga direktiba ang Department of Interior and Local Government , apan wala kini panumbalinga sa mga incumbent officials tungod kay wala man sab nilay mobadlong.

Kay karon man gud kun dunay mobadlong pasanginlan namang nang-harass o namulitika. Ang magtinarong, balihon naman hinuon ug mao naman hinuoy himuong dautan. Tipikal nga mga senaryo basta naghinangat ang eleksyon.

Usahay sab makahibulong pud ning ubang mga ahensiya sa gobiyerno nga mao untay dunay gahum pagbadlong, dili man sila kakita anang maong mga dayag nga paglapas. Ang gusto nila, dunay pribadong tawo o indibidwal o ba kaha ang kaatbang nga politiko o partido maoy mopasaka og reklamo batok sa nakitang mga paglapas. Dawat og limpyo.

Gawas pa niana, dunay mga reklamo ang ubang kandidato tungod sa matud pa dili patas nga pagtagad sa mga incumbent officials sa pipila ka LGUs tungod sa paghigpit kanila sa ilang mga ipahigayong mga politikanhong kalihokan. Apan kaning maong mga lokal nga opisyal walay kuskos-balungos nga miaprubar sa mga kalihokan sa mga kandidato o partido kun diin sila nilaban. Dili ba mas maayo kun patas lang.

Hinuon duna man silay mga eksplinasyon nga maayo sab hatagan og gibug-aton og pagtagad luyo aning mga pasangil nga dili sila patas.  Balido baya sab ilang mga rason kun nganong naingon man niini ang nahitabo.

Apan bisan pa man kung sakto ba o dili ang ilang rason o ba kaha nasayop lang ang mga namasangil sa ilang mga gipangbuhat, dili maayong but-an ang mga botante kay makasabot man sila sa mga panghitabo.