Ang kapolisan ug ang mga bata sa Carmen

Aniay programa sa kapolisan sa lungsod sa Carmen ang angayan nga daygon mahitungod sa pagpakuha og pagsalig sa katawhan pinaagi sa ilang pagpakigsuod sa mga bata.

Kini ang Bible on Wheels ug ang Mobile Library nga taudtaud na nilang napahigayon ug daghan na usab nga mga bata ang ilang nadani sa pag apil niini apil na gani kadtong atoa mahimutang sa mga baranggay sa hilit nga dapit sa lungsod sa Carmen.

Nahinabi nako ang ilang hepe nga si Police Major Eric Gingoyon, nagkanayon kini nga gitinguha nila nga makabig ang katawhan sa ilang lungsod pinaagi sa mga bata aron subling molig-on ang pagsalig sa kapolisan.

Giangkon niini nga adunay mga panghitabo kaniadto sa ilang lungsod nga nakamantsa gamay sa trust and confidence sa mga tawo busa gipaningkamotan nila nga mapaduol sa mga tawo.

Sakto pud ang gihimo nila nga ang mga bata maoy ilang gisentro sa programa kay kong makuha na nila ang buot sa mga bata ug mao na usab kiniy mohangyo sa ilang mga ginikanan, seguradong dili makabalibad ang mga ginikanan kong ang mga anak na ang mangayo.

Ang sa mobile library program, gigamit nila ang patrol car nga gibutangan nila og improvised books shelves aron murag library tan-awon, samtang ang mga libro gikan sa mga tawo nga nag donate niini.

Ang mga pulis ang mangunay sa pagduol ngadto sa mga dapit og sila pud ang mag basa sa mga estorya ngadto sa mga bata.

Nindot ra gyud mamati ta og estorya gikan sa libro sama sa atong nasinatian kaniadto, maka-relate ko kay sa among probinsya mao ra kini ang kalingawan diin magkuha og libro ang akong amahan og mag storytelling dayon. Nindot ang paminaw kay molupad ang atong imahenasyon.

Dinhi napakita sa kapolisan nga dili sila angayan kahadlokan kay mismo ang mga bata man ang ilang giamigo. Lahi sa uban nga gamiton ang ngalan sa pulis aron ipanghadlok sa mga bata, moingon dayon ang ginikanan nga “hala dakpon ka sa pulis.” Apan tungod sa gihimo sa mga sakop sa Carmen Police Station, inig makadungog ang mga bata nga adunay pulis, malipay sila og moduol dayon.

Labaw sa tanan ang ilang Bible on Wheels maoy nakaganoy sa mga bata og sa mga ginikanan sa pagpaduol sa Ginoo, usa kini ka lakang sa pagpalambo sa espiritohanong aspeto sa mga tawo.

Ang ingon niini nga programa angayan nga himoon sumbanan sa ubang mga law enforcement agency. Kong nahimo sa Carmen Police Station mahimo usab kini sa uban.