EDITORYAL - SIM Card Act

Gi-veto ni Presidente Rodrigo Duterte ang “Subscriber Identity Module” o mas naila sa tawag nga SIM Card Act tungod sa matud pa gipuno nga probisyon nga giduha-duhaang makalapas sa Batakang Balaod.

Ang SIM Card Law nagmando sa mga telcos nga kinahanglang rehistrado sa gobiyerno ang matag SIM card account subscribers kun kinsa ang tawong nigamit niini.

Pinaagi niini, ang mga tiggamitan og cellphones nga dunay SIM cards dali lang mailhan kay ma-trace kun kang kinsa ang numero apan mao sab kini ang mahitabo unya sa mga social media users sa maong balaudnon.

Maayo ang tumong niini kay protektado ang mga prepaid users gikan sa mga mangingilad, panghulga, scammers, extortion, ug makatabang para sa seguridad sa nasud gikan terorismo ug uban pa.

Ang mga prepaid SIM cards karon dili ma-trace kay mahimo rang ilabay inig human og gamit ug ilisan nasab og bag-o. Mao usab sa social media nga magilis-ilis ra og pangalan sa account. Pinaagi sa SIM Card law di na kini mahimo. Sa pagkakaron, naghitak diha sa social media ang mga fake news, misinformation, disinformation ug pagpanghulga ug uban pa ilabi na karong naghinangat ang eleksyon. Ang social media nakadiktar ug nakaimpluwensiya sa hunahuna sa mga botante sugod pa niadtong 2016 elections.

Gi-veto kini ni Duterte tungod sa pag-apil sa social media users nga kinahanglang irehistro ngadto sa gobiyerno. Si Duterte usa sa gipasanginlang nakabenepisyo gikan sa social media trolls nga giingong nakapahimo kaniyang popular ug nakapaguba sa imahe sa iyang mga kaatbang niadtong naghinangat pa ang 2016 elections. Apan si Duterte miingon nga pinaagi sa maong probisyon makapanghilabot ug makapangespiya sa mga social media users ang gobiyerno. Hulga unya kini sa mga katungod nga giprotektahan sa Konstitusyon.

Apan maayo sab kini kay mahadlok na unya ang mga political trolls ug mga scammers diha sa social media.  Apan sa samang paagi mahimo sab kining gamiton sa mga naa sa gobiyerno batok sa ilang mga kritiko.

Si Senate President Vicente “Tito”Sotto III miingon nga aron mapasar kini, mahimong i-overturn sa Kongreso ang veto power ni Duterte, kwestyunon nalang didto sa Korte Suprema ang probisyon o ba kaha i-refile kini sa sunod nga Kongreso human sa eleksyon apan tangtangon ang maong probisyon.