Tawirwir ang DOJ

Mihangyo si Justice Secretary Menardo Guevarra sa NBI nga mopakatap og mga agents diha sa mga campaign rallies aron madakpan sa akto kadto’ng mamalit og boto ug dili kay magpaabot lang nga adunay moreklamo.  Kon tinud-on sa NBI ang pagpaniid atol sa campaign rally, hayan adunay madakpan nga makahimo sa maong salaod.  Apan tungod kay gipahibawo na man usab daan ang maong stratehiya, hayan karon pa lang naglaraw na ang mga kandidato unsaon nga malutsan ang NBI.  Haum niini ang panultihon nga “Ang tawirwir nga bâbâ, makapalunod sa bangkâ”.  Saoonz!

Mogasto bisan pildero

Kon ang COMELEC ang pasultihon, walay kandidto sa pagka-presidente karon Eleksyon 2022 nga maingon nato nga “nuisance candidate”. Gipasabot ni COMELEC Spokesperson James Jimenez nga ilang gikonsiderar nga opisyal nga kandidato kadtong adunay kakayahan mangampanya ingon man may kahigayonan sa pagdaug.  Hustong edad ug “able to read and write” lang ang kwalipikasyon nga gilatid sa balaod alang sa pagka-kandidato.  Ang wala malatid apan labing mahinungdanon’g kwalipikasyon mao nga kinahanglan adunay kwarta ang mokandidato.  Sa ato’ng sistema sa eleksyon, bisan gani kon magpapilde ang kandidato, kinahanglan gihapon siya’ng mogasto.  Fezteleern!

Diskriminasyon sa mga potot?

Dili paapilon sa political rally sa BOPK kadtong mga potot o ubos sa 4 ka piye ang gitas-on aron malikayan ang disgrasya kon ugaling adunay mahitabong “stampede”.  Gisaway ang maong lagda kay maingon man kini nga diskriminasyon sa mga mugbo’ng tawo.  Angayan mahinumduman nga ang pagka-mubô dili parehas sa pagka-bata.  Daghan’g mubô nga tawo nga lantip ang panghunahuna sama nga daghan usab ang tag-as nga tawo apan “walay landong”.  Dili lalim nga, tungod lang sa kakulang sa height, dili ka pasakyon sa roller coaster, pero dili na pud ka padula-on sa playground sa Jollibee.  Pagkatoytoy!

I-cull ang kiriwan

Mokabat sa 2,600 ka mga itik ang gipang-cull didto sa M’lang, North Cotabato tungod sa mihugpa nga Avian influenza sa maong dapit.  Ang pag-cull sa mga itik gitugot sa Municipal Agriculture Office aron kapugngan ang pagkuyanap sa sakit.  Daw mapintas ang maong solusyon apan mao lamang kini ang paagi aron kapugngan ang dakong kadaut.  Kon sama lang pud unta kasayon sa pag-cull ang paagi pagpuhag sa mga kiriwan sa gobyerno, tunhay tingale ang pangagamhanan.  Inay ang COA ug Ombudsman, ang Department of Agriculture na lang atong sangunan sa pagpuhag sa kurapsyon nga maoy dakong balatian sa kagamhanan. Abeerr!

Imo-imo ra na!

Gikahinangop ni Senador Manny Pacquiao ang pamahayag ni Presidente Duterte nga wala siya’y gi-endorso nga kandidato pagka-presidente karong Eleksyon 2022. Alang sa senador, sama ra nga siya maoy gi-endorso sa Presidente.  Ginaingon baya nga ang sayop nga pangagpas maoy sinugdanan sa tanang kapakyasan ug ang paghimo’g mga pangagpas bisan sa kakulang sa kamatuoran dili senyales sa lantip nga hunahuna.  Matud pa sa pagya sa mga bata didto sa among probinsya, “Imo-imo na laman na Sir Manny”.  Madahaaan!