Kun si kinsa ang walay wala?

Abril 4, 2022: Ikalimang Domingo sa kwaresma

Mga Pagbasa: Is. 43;16-21/Sal. 126/Fil. 3;8-14/Jn. 8;1-11

Kun tukion ang balaod kaniadto nga naglambigit sa pagsilot sa mga nasakpan nga nanapaw anaa ang bias. Dili ikalimod nga usahay mas pabor kini sa mga lalaki kaysa mga babaye.

Kun masakpan ka ang mahitabo mao nga dad-on ka ngadto sa atubangan mismo sa imong panimalay aron batoon. Ang unang mobato mao ang imong amahan o dili ba kaha ang imong igsuong lalaki.

Kay ang sala dili lang kalabot sa pagpanapaw kondili sa pagpakauwaw sa banay sa imong amahan. Gimando kini sa balaod ni Moises.

Ilang gidala ang maong babaye nga nasakpan nga nanapaw ngadto kang Jesus aron pangayoon ang iyang panahom kalabot ning maong balansayon bisan pa man kun sa ilang kaugalingon mismo may laraw sila sa pagbitik kaniya kalabot niini. Kun mouyon si Jesus nga batoon ang maong babaye nan, moingon ang kadaghanan nga wala siyay kaluoy.

Ug kun iyang tugotan ang maong babaye nga pasayloon moingon sila nga wala siyay pagtagad sa balaod ni Moises. Mao nga si Jesus niingon: “Kun kinsa kaninyo ang walay sala maoy unang mobato kaniya. Giigo ni Jesus dili ang ilang hunahuna sanglit daghan man silang ikasulti.

Mao nga gitukbil ni Jesus ang ilang mga tanlag diha sa iyang pag-ingon: “Kun si kinsa kaninyo ang walay sala maoy paunaha og bato kaniya! Mao nga namahawa ang tanan una ang  mga tigulang. Si Jesus wala mohatag sa iyang panghimaraot hinunoa anaa siyay pahimangno: “Pauli ug ayaw na pagpakasala!”

Kining maong teksto mahimong gamiton dayon niadtong mohimo og paglaban sa ilang giidolo nga kandidato.

Tinuod man ang pagpasaylo balaanon apan wala kini magpasabot nga wala kay pagahimoong reparation ug labaw sa tanan sense of remorse sa nabuhat niadtong dulom nga kagahapon. Hinuon malisud ang pagpasabot ni ang pagpadangat sa atong panahom labina kun pangisip sa kadaghanan sa moralidad nga Kristohanon dili na haom.

Mas dali ang pagsilot sa mga yamokmok ug gani ang pagpatay kanila kaysa mga kaalyadong away awayon diha sa media aron pagtabon sa ilang bisyo ginamit ang pagpaaron nga birtud.

Tinuod kitang tanan makasala apan malisud ang pag move on labina kun padayong anaa sa pinalabing posisyon ang mga masalaypon nga sa atong nasudnong seguridad ug kalamboan usa man ka dakong maldisyon.