Maayong pagpahulay, Bob

Hangtod karon, halos dili pa gihapon ako makatuo nga mipanaw na ngadto sa laing kalibotan ang usa sa akong suod nga higala sa industriya sa media nga si Bobby Nalzaro, ang usa sa nag-unang broadcaster sa Kabisayaan ug Mindanao.

Niadtong labing ulahi namong panagkita uban sa among grupo sa usa sa mga hotel sa dakbayan sa Sugbo, baskog pa kaayo si Bobby. Gani wala ko makakita og sinyales nga aduna siyay seryosong balitian nga gihambin. Sa una namong panagkita ni Bobby, dako iyang kalipay dihang ako siyang giingnan nga taga Mindanao usab ko. Taga dakbayan sa Dipolog sa Zamboanga del Norte si Bobby samtang taga Tambulig, Zamboanga del Sur usab ako.

Gani, matud niya nga sama kaniya, nalipay usab siya sa nakab-ot nako ug sa uban sa industriya kinsa misaka gikan sa ubos nga ranggo ngadto sa taas-taas nga posisyon, bunga sa sige nga pagpursige ug paningkamot.

Pareha mi ni Bobby nga nagsugod sa among propesyon didto sa Mindanao, partikular na didto sa Zamboanga Peninsula. Apan managlahi among field kay siya anaa sa broadcast industry samtang ako sa print media.

Unang nagtingog si Bobby sa radyo didto sa dakbayan sa Zamboanga sa dekada otsienta ug milalin dinhi sa Sugbo diin siya nahimo nga inila gumikan sa iyang mga hait nga komentaryo sa kahanginan.

Niining kalit nga pagtaliwan ni Bobby ngadto sa laing kalibotan, grabe usab ang pagkatay -og sa propesyon sa media sa Sugbo ug Kabisayaan. Ang iyang pagpahulay nagbilin og dakong haw-ang sulod sa industriya.

Walay sama sa iyang dedikasyon sa propesyon, ilabina kon ang kaligdong ug integridad ang hisgotan. Matupngan man gani ang abilidad ni Bobby apan dili kini malabwan. Padayon sa panaw, Bob.