Sama sa naandan, uwahi na
Ang ubang kanasuran nisuspenso na sa ilang pagkolekta sa buhis sa mga produkto sa lana ug nihatag na og ayuda ngadto sa ilang mga drayber ug mga konsumidor nga labing naapiki sa napu na ka semana nga sunudsunod nga sulbong sa presyo sa lana.
Pero si Presidente Rodrigo Duterte mao pay pagsugo sa National Economic and Development Authority (NEDA), Department of Energy (DOE), Department of Trade and Industry (DTI), Department of Finance (DOF) ug Department of National Defense (DND) sa pagtuon sa mga implikasyon sa dagkong mga uminto sa lana.
* * *
Ang iyang tinudlo nga mga opisyal sa DOE sa niaging tuig ra nga nirekomendar nga suspensohon ang excise tax sa mga produkto sa lana ubos sa iyang TRAIN (Tax Reform for Acceleration and Inclusion) Law ug sublion ang oil deregulation law nga nipatuyang sa mga kompaniya sa lana sa pagpasaka sa ilang presyo.
Pero si Presidente Duterte karon pa kakita sa panginahanglan sa pagsugo ni Executive Secretary Salvador Medialdea sa pag-andam sa mga lagda nga kinahanglang ipatuman aron nga di maapiki ang katawhan (nga hagbay rang nagping-it) sa kamahal sa lana ug ubang mga palaliton.
* * *
Iyang mga alyado nga mga senador ug mga kongresista, apil nang iyang batabata nga si Senador Bong Go, pila na ka semana nga nag-awhag sa pagpatawag og special session aron mapasar ang balaudnon pagsuspenso sa excise tax.
Pero si Presidente Duterte, sa nauwahi na pag-ayo niyang sugo ngadto nilang Medialdea ug sa iyang economic managers, wa gani maghisgot sa special session ni sa excise tax.
* * *
Mas sakto si Senate Minority Leader Franklin Drilon: Way balaod nga nagdili sa pamunoang Duterte sa pagsuspenso sa excise tax sa labing daling panahon; ug nga di angay’ng magpasalipod ang presidente sa iyang TRAIN Law aron mangiyugpos sa dinaliang panginahanglan sa pagpagaan sa palas-unon sa katawhan.
Gipahinumdoman ni Drilon ang presidente ug iyang mga sinaligan nga ang balaod gipanday aron pagpanalipod sa katawhan. Maong di angay nga hubaron sa pagpasamot sa ilang kalisod. Ambot kanus-a pa makaamgo ang presidente nga, sama sa pagtambal sa mga pasyente ug pagpamakuna sa COVID-19 ug pagtabang sa mga nagrabehan sa pandemya, naiwit na sab siya.
* * *
- Latest
