Labti 24/7 kada tuig ang paglikay sa sunog

Gibuksan kagahapong adlawa ang Fire Prevention Month pinaagi sa gihimong seremonyas sa nagkadaiyang buhatan ubos sa Bureau of Fire Protection diin ang ang tema karong tuiga mao ang “Sa Pag-iwas sa Sunog. Hindi ka Nag-iisa” o sa binisaya pa sa paglikay sa sunog wala ka nag-inusara.

Tinuod gyud kay kong magdanghag ang usa ang tanan madamay, daghan nga kabtangan ang maabo tungod lang kay wala mag amping nga misangpot sa pagsilaob sa kalayo nga molamoy sa kabalayan nga mosangpot gani sa pagkakalas sa kinabuhi sa mga tawo.

Ang buwan sa Marso giisip nga labing init nga panahon sa tuig diin dinhi kasagaran mahitabo ang sunog kay dali ra malaya ang mga sagbot ug kakahoyan nga gamay’ng bag-id lang moaso na o kaha malabayan og opos sa siragarilyo mamahimo nang makamugna sa sunog.

Gipanghimug-atan sa kabomberohan nga bisan og sa Marso ang ceremonial kick-off apan 24/7 kada tuig ang fire prevention nga gikinahanglan magtambayayong ang tanan dili lang ang BFP kon dili gikinahanglan nga moapil gyud ang katawhan sa pagpanalipod gikan sa trahedya nga mamugna sa sunog.

Admitido man ang BFP-7 nga dakong hagit kanila ang panahon sa pandemic tungod kay limitado ang access sa mga tawo diin nahunong ang linawas nga pagpakiglambigit sa katawhan sa ilang information drive.

Apan nagpadayon kini pinaagi usab sa technology, ang paggamit sa social media diin nakabutang ang mga kasayoran sa angayan ug dili angayan nga pagahimoon alang sa paglikay sa sunog.

Gawas sa sunog, miabag usab ang mga bombero sa uban pang mga gimbuhaton sa pagluwas sa kinabuhi sa mga tawo sama sa rescue operation ugaling makasugat og problema sa kinaiyahan, usa sila sa unang mo-responde.

Hinaut unta nga dili lang kutob sa seremonyas ang tanan. Himoon ug segurohon gyud nga mabarugan nga walay mahitabong sunog pinaagi sa panagtambayayong ug pag amping sa tanan.

Basin baya maayo lang ang presentasyon sa ceremonial kick-off apan sa actual nga panghitabo magkayamokat lang ang agi.

Dili man perpekto ang atong mga bombero apan kong abagan sa mga tawo dako na kaayo kini og mahimo.