Lana, gubat ug Omicron
Sa ikaupat nga sunudsunod nga semana, dakong sulbong na sab sa presyo sa mga produkto sa lana ang nisugat sa mga motorista sa Sugbo ug ubang bahin sa Pilipinas karong buntag: P1.90 kada litro sa krudo; P1.45 kada litro sa gasolina; ug P1.70 kada litro sa kerosene.
Gipasabot sa mga kompaniya sa lana nga ang padayon nga pagsaka sa presyo sa lana sa merkado sa kalibotan nanukad sa kanihit sa suplay ug ang pagsulbong sa demanda bisan sa makalilisang nga pagkatap sa Omicron sa nagkalainlain nga kanasuran.
* * *
Labing seryosong hinungdan sa kakuwang sa kalibotanong suplay sa lana:
Kapakyas sa Opec+ nga gipangulohan sa Saudi Arabia ug Russia sa pagtuman sa ilang saad sa pagdugang og 400,000 ka baril sa ilang inadlaw nga produksiyon sugod karong buwana (napakyas ang mga sakop pagpalambo sa ilang oil fields tungod sa hulga sa renewable energy); ug
Pagtidlom sa produksiyon sa lana sa Estados Unidos, kansang konsumo mas mosaka pa tungod sa tingtugnaw, maong di na kapakita sa iyang braso pinaagi sa pagpabaha og dugang suplay sa world market.
* * *
Gawas sa mas ubos nga kapasidad, nahasol ang suplay sa duha ka hulga sa gubat sa Middle East ug Eastern Europe:
Nagbinayloay og missiles ang United Arab Emirates (UAE) ug mga rebeldeng Houthi (Ansar Allah) sa Yemen; ug
Nagkadako ang kahigayonan nga sulngon sa mga sundawo ni Russian President Vladimir Putin ang Ukraine maong gipapauli na sa Estados Unidos ug ubang kanasuran ang mga kawani sa ilang mga embahada.
* * *
Wa matinuod ang mga pasidaan nga moluhod ang kalibotanong ekonomiya tungod sa mas mananakod nga Omicron. T
inuod nga nisulbong ang mga kaso pero nimenos ang mga na-ospital ug nangamatay. Mga nasud nga naigo sa Omicron nakaginhawa og luag kay samtang wa pa motidlom ang mga kaso pero nihinay na ang tinakdanay.
Nga maoy gipanghinaut sa mga eksperto nga mahitabo dinhi sa ato. Samtang mao pay pagsulbong sa bag-ong mga kaso sa Sugbo ug Central Visayas, nagsugod na og tidlom sa mas unang naigo nga Metro Manila.
Laing bentaha mao ang nagtubo nga mga ebidensiya nga ang Omicron nakamugna lang og kasarangang trangkaso. Labi na sa mga bakunado.
* * *
- Latest
