Proyekto sa bike lane barriers palpak

Ang pagtaod og mga ali sa agianan sa biseklita sa kadalanan, diin ang tumong aron maprotektahan ang magbiskelita, maayo man. Apan kon ang maong bag-ong natukod nga proyekto didto itaod sa mga daang karsada, maguba gyod ang nawong sa karsada ug hitsura sa mga motorista.

Kay kini sama sa gipahimangno ni Hesus sa Iyang mga tinun-an: “Walay magtapak og bag-ong panapton sa daang bisti. Kay ang maong tapak mokulo ug mosamot kadako ang gisi. Ayawg isulod ang bag-ong bino sa daang sudlanan. Kon imo ning buhaton magisi ang daang sudlanan nga panit ug madaot ang bino. Hinuon, isulod ang bag-ong bino sa bag-ong sudlanan aron walay maunsa sa duha.” (Mateo 9:16-17).

Ug mao kini nahitabo sa mga gipabarog nga bag-ong bike lane barriers sa daan nga mga karsada. Humok ra kaayong nangaguba ang nawong, dili lang sa red flex posts ug karsada. Kondili, hasta ang mga masuk-anong panagway sa tanang gumagamitay sa kadalanan. Kay dili man mga bag-ong karsada ang gitarokan sa mga bag-ong barrier.

Hinungdan, nga migamay ang dalan ug usab nakapagamay sa pasensiya sa mga motorista, kinsa saksi nga wala gyod gamita sa mga tigbiseklita ang bike lanes nga para kanila.

Dapat unta, bag-ong bike lane barriers, bag-ong karsada. Dapat, tanang consensus sa katawhan, ang gikuha, nungkang usa ka pudyot ra sa grupo ang gikonsulta.

Unta, adunay makuting feasibility study nga makahatag og seguridad nga ang pagtukod sa maong proyekto mao ang tukmang sulbad sa giatubang tang suliran sa karsada.

Dili kay makadugang hinuon sa kahuot sa trapiko ug kapuot sa dughan sa mga magbubuhis, kansang salapi nga gipatud-ag luha, singot ug dugo, giusik-usikan lang sa mga nagpondar niining proyektoha, nga ambot, sila ra tingale ang nahimuot?

Ang mga plastic red flex post nga giali sa bike lanes nagmatuod lang sa kapalpakan nga pagkatukod niini. Wala na kini kinahanglana. Ang kanhi bike lanes nga mahimo rag badlisag pintal, igo na kaayo unta. Unya, minus pa ang magasto. Mahimo pang flexible ang agianan.

Sakit sa panan-aw ang maong mga barrier. Makapahinumdom giunsa pag-sayang sa kagamhanan atong kuwarta. Busa, angay nang ibton tanan. Ayawat, makibhangag diyotay ang kasakit sa atong dughan.