Bangkil sa pandemiya

Dako atong kalipay sa dihang grabe nga mikunhod ang mga kaso sa coronavirus disease sa dakbayan ug lalawigan sa Sugbo, ug sa kinatibuk-ang Central Visayas, sa naghinapos nga bahin sa nakalabay nga tuig.

Daghan kanato ang nagtuo nga sa katapusan, hinayhinay na kitang midaug batok sa makamatay nga COVID-19 nga mihasi kanato ug mitakboy sa hapit tres milyones na ka Pilipino sulod na sa duha ka tuig.

Apan, sa usa lamang nato ka pamilok, kalit lamang nga nausab ang kamada. Nahigmata na lamang kita sa balita nga misulbong na usab ang mga kaso sa COVID-19 dinhi sa Sugbo ug sa kinatibuk-an sa Pilipinas karong bag-ong tuig.

Gani, gikan niadtong Enero 1 hangtod sa Enero 8, doble matag adlaw ang pagsaka sa mga bag-ong kaso sa coronavirus disease dinhi sa dakbayan sa Sugbo. Kaniadtong Sabado lamang, ang siyudad mitala og 79 ka bag-ong mga kaso.

Ang makalilisang niini mao nga sa kinatibuk-ang ihap sa nasud, subra sa 15,000 ka bag-ong kaso sa COVID-19 ang marekord matag adlaw. Labing daghan niini ang tua natala sa Metro Manila ug kasikbit nga mga probinsiya. Mugna na ba kaha kining makahahadlok nga kalamboan sa omicron, ang bag-ong variant sa coronavirus disease, nga mihasi pag-ayo sa kalibotan karon? Dili kuno seryoso ang maong variant. Apan hilabihan kini ka mamanakod.

Hinuon, dinhi sa Sugbo, wala pay rekord ang kagamhanan kon mugna ba sa omicron kining pagsulbong sa mga bag-ong kaso sa coronavirus bisan pa man kun duna nay mga positibo sa maong variant nga mitugpa sa Mactan airport.

Apan usa lamang ang hinungdan niining dili maayong kalamboan. Ug kini mao ang kakulang sa kinabag-an pagtamod sa mga lagda batok sa maong balatian. Daghan kanato ang nakalimot nga ania pa kita ilalum sa bangkil sa pandemiya.