Pwede ra’g matulog

Upat ka kandidato pagka kongresista dinhi sa Cebu ang pwede ra magtulog-tulog kay wa man sila’y kaatbang, ug bisan ang kaugalingon nilang botos makapadaog na nila.

Sila mao si 1st District congressional aspirant Rhea Gullas; 3rd District reelectionist Congressman Pablo John Garcia; 6th District reelectionist Congressman Lolypop Ouano-Dizon nga milansar sa Mandaue City Lone district; ug si 7th District reelectionist Congressman Peter John Calderon.

Sa 1st district, si Talisay City Mayor Samsam Gullas gyud maoy misang-at og Certificate of Candidacy pagka kongresista, apan nagpapuli siya sa iyang asawa nga si Rhea Gullas nga wa na modayon pagka mayor.

Aw, karon, pwerteng hayahaya ni Rhea Gullas kay sigurado man siya nga daog na uban sa laing tulo pa ka kandidato.

Husto ang gihimo ni Mayor Samsam nga siya maoy makig-atbang kang Vice Mayor Allan Bucao kay nagpaila kini nga gipangga gyud niya ang iyang asawa aron dili matagbaw sa pagpangampanya.

Kon si Rhea Gullas pa ang ikasangka ni Vice Mayor Bucao, dili kaayo siya kulbaan, apan kay si Mayor Samsam man ang makig-atbang kaniya, paminaw ko mikulismaot ang dagway ni Bucao.

* * *

Pagkakaron, mingaw pa kaayo ang mga kandidato kay nangandam pa tingali’g kusog. Apan sigurado ko nga karong sunod tuig, mosugod na sila pagpanuroy sa mga dapit sa botante.

Pero sa social media, daghan na nga kandidato ang naghimo og mga post nga nagtug-an sa publiko nga sila nagpapili sa mga katungdanan sa kagamhanan.

Abi ninyo, makabentaha gyud kadtong abtik nga mohimo’g propaganda sa ilang kandidatura kay daghan pa nga botante karon nga wa kaayo masayod kon kinsa ang maayong botohan.

Sa ato pa, dunay posibilidad nga uban-uban ra sila kon kinsa ang sikat ug maoy ilang botaran. Ang tinuod dili kay ang kasikat sa botante maoy basehanan sa maayong pilion.

Ang mga kandidato moingon gyud nga sila dili kurap nga pagkatawo, apan kon imong sutaon pag-ayo, makita nimo ang ilang mga binuhatan.

Gani dunay mga kandidato nga nag-atubang na og kaso sa hukmanan apan wa pa lang mahukmi nga sad-an, ang uban sab sad-an apan giapelar lang ang hukom sa ilang kaso.

Apan mao lagi, abi kay kwartahan ang maong mga kandidato ug posibleng manghatag og kwarta, humot kini sa mga botante.

Sa mga opisyal nga nakalingkod na sa katungdanan, angay natong sutaon kon unsay ilang mga nahimo nga kaayohan sa publiko nga makaingon kita nga angay sila natong botohan sa eleksyon.