Vote-buying di sala?

Sa Omnibus Election Code Article XXII, ang vote buying hugtanong gidili. Ang mosupak niini o ang mamatud-ang mohimo niini, silotan.

Mapriso labing ubos usa ka tuig ug dili molapas sa unom ka tuig. Unya, ma-disqualify o mawad-ag puwesto sa gobiyerno sa iyang pagkamangangalagad sa katawhan. Ug dili na makabotar.

Pero makalibog. Kay sa usa ka Kasambahay on-line forum, dihang gipangutana si Bise Presidente Leni Robredo unsay iyang ikasulti bahin sa vote buying, mitubag man tuod nga:

”Mali siya. Mali po yong pagbibili ng boto.” Pero kalit lang mikambiyo pinaagi sa pagdasig sa katawhan nga kon may kandidato kunong mamalit og boto, ipadawat! Total, ang kuwartang gigamit gikan ra man usab natong katawhan. Apan botar base sa imong konsensiya.

Pastilan, si Leni magpapili ra ba pagka-presidente sa Pilipinas sunod tuig. Unya, imbes tudloan niyag ‘honesty’ ang katawhan, iya man hinuong gitudloan og panikas, uy?

Hinuon, gidapigan si Leni ni Bishop Socrates Villegas, kinsa namahayag, nga ang vote buying dili kuno sala. Ug midugang nga: “Halimbawa. Yong tauhan ng kandidato o yong kandidato mismo, bigyan ka ng daandaan o libolibo para iboto siya. Pero tinanggap mo, pero di mo siya ibinoto. Kasalanan ba yon?

Walang pananagotan o sagutin na tumupad sa isang usapan na ilegal o immoral.

Ang pagbili ng boto, eh’y pagbinta ng boto ay kasalanan sa Diyos at labag sa batas.

Pero kung ikaw’y nagugutom, kung ikaw ay nangangailangan, puwede mong tanggapin yon, pero huwag mong tutuparin yong ipinagagawa sa iyo.” Mao ba?

Alang nako, ang sayop dili matabonag laing sayop. Sa pagdawat pa lang sa kuwartang gibayad sa boto, sala na kana. Ug kon dili maoy botaran ang namalit, gumikan sa bisan unsang rason, ang sala napun-ag lain. Sanglit wala mo man tumana ang unsay inyong gikasabotan.

Kon ang tuboran sa tubig nga imong gikawsan hugaw, ang imong nakawos hugaw usab. Ug bisag ibalhin mo kinig laing balde, ang iyang kahugaw dili mahanaw.

Sama sa vote buying. Ang salaping gibayad hugaw. Ug gamiton man kini sa bisan unsa, kini magpabiling hugaw.

Busa, dili nato mabasol ang milyonmilyong netizens ug citizens ang misupak-batikos nila ni Leni ug Bishop, kinsa miingon: “Ang vote-buying dili sala!”