Ayom-ayoma lang

Kon si Presidente Duterte ang pasultihon, mahimo ra’ng ayom-ayomon mismo sa mga health workers ang ilang face shields kon maguba na kini.  Nunot kini sa pag-angkon ni DOH Sec. Duque nga ang face shields mo-expire paglabay sa 36 ka bulan.  Daw nasalindot man ang tinuod nga isyu sa anomaliya ni’ng kalakiha ug nahimo’ng yagâ-yagâ na lang ang tanan.  Makapahinumdum sa bana nga kon kabit ang mamarayeg og butang, dali ra kaayo nakatubag nga “Palitaaa”. Apan sa iyang asawa nga mihangyo nga ilisan ang iyang duster kay gisi-on na, miingon lang nga, “Ay daaa, tapaki lang sa gud na”.  Pagkatoytoy!

Naay job, di job-bon

Sa deliberasyon sa Kongreso sa budget sa DOH sa tuig 2022, nasutâ nga 38% lamang sa ilang pundo sa tuig 2021 ang nagamit sa ahensiya ug kini nakapa-alarma sa mga Kongresista. Dili maayong tilimad-on ang maong utilization rate sa budget sa DOH tungod kay dako man unta ang panginahanglan labi na atol niining pandemya.  Pastilan ang DOH, gihatagan na gayod sila sa kagahum ug sa saktong pundo apan nilutaw ang kabulay-og sa liderato sa maong ahensya.  Nahaum sila sa pagya nga, “Kon walay job, mangita’g job. Unya kon naa na’y job, di pud job-bon”. Way kahumanan ang COVID.  Fezteleern!

Supak apan sagdi lang

Nagtuo si Presidente Duterte nga ang iyang laraw pagdagan pagka Bise Presidente sa Mayo 2022 elections wala makasupak sa Batakang Balaod.  Migawas segun sa survey nga mayoriya sa mga Pinoy nagtoo nga nahasupak sa Konstitusyon ang maong laraw.  Dili mo-disqualify og kandidato ang Comelec pinaagi lang sa resulta sa survey.  Kinahanglan nga adunay reklamo nga ipasaka.  Ang pagpunay’g bagolbol nga walay kauban nga buhat, walay kapa-ingnan.  Matud pa bitaw, “Walay gibuhat ang kagamahanan sa katawhan nga wala niya itugot”. May’pag moligeed!

Wagtangon na ang IATF?

Misugyot si Senador Joel Villanueva nga bungkagon ug wagtangon na ang COVID-19 Inter-Agency Task Force tungod kay wala kini pulos ug nga ihatag na lang sa mga lokal nga kagamhanan ang kagahum sa pagbatok sa COVID-19 kay mas nasayod ug mas maantigo ang naulahi pagbatok sa pandemya.  Angayan tun-an ang maong sugyot.  Managlahi ang kahimtang sa matag-LGU.  Matud pa bitaw sa akong amigo, “Maayo hinoon nga lokal ang modala kay sayon ra nato dayegon kon mosalir, unya dali ra nato mabasol kon mopalpak”.  Hala na!

Nahibaw-an na daan

Imbestigaron sa Kongreso ang giingon nga ilegal nga pagpayuhot sa mga carrots dinhi sa nasud nga nakaapekto pag-ayo sa kitâ sa mga lokal nga mag-uuma. Alang sa mga Kongresista, usa kini ka economic sabotage.  Ang ilegal nga importasyon mitumaw luyo sa pasalig sa Bureau of Plant Industry nga wala sila’y gihatag nga import permit.  Kon imbestigasyon lang, dili kini makapahunong sa krisis sa ilegal nga importasyon.   Kay lage, sagad sa ekonomikanhon krisis, daan na man nga nahibaw-an sa kagamhanan ang hinungdan. Saoonz!