Bayad sa utang

Inanay nang natubag sa nagpadayong imbistigasyon sa Senate Blue Ribbon Committee ang mga kalibog ug pangutana nganong labihan nakadepensa ni Presidente Rodrigo Duterte ni Health Secretary Francisco Duque bisan sa mga pasangil sa kapalpakan ug anomaliya taliwa sa pagtubag sa gobyerno sa COVID-19  pandemic.

Dili mahimong biyaan ug pasagdan si Duque taliwa sa mga pasangil tungod kay piligrong mosuka sa tanan niyang nahibaw-an.

Mao ni hinungdan bisan nakompromiso na sa iyang mga saad niadto nga tangtangon sa pwesto si bisan kinsang mapasanginlan og anomaliya, pabiling giduphan ni Duterte si Duque.

Unsaon nga tua man paingon sa iyang nataran ang imbistigasyon ron sa Senado sa mga transaksiyon sa DOH.

Nadiskubrehan sa komitiba ni Senador Richard Gordon nga ang misipong sa mga kontrata sa DOH pagtubag sa pandemya mao ang kompaniya nga konektado sa kanhi niya economic adviser nga si Michael Yang.

Ang nagmaniho sab aron mahatag ang mga kontrata nga mobalor og P8.68 bilyones ngadto sa Pharmally Pharmaceuticals mao ang kanhi Undersecretary sa Department of Budget and Management (DBM) nga si Lloyd Christopher Lao kinsa nailang bata-bata ni Senador Bong Go.

Basi sa mga dokumento gikan sa  Securities and Exchange Commission (SEC), ang kompaniya narehistro niadto lang  Sept. 4, 2019.

Wala gyud ni record sa pagpangontrata sa gobyerno nga usa sa mga requirement sa balaod alang sa tanang kontratista sa kagamhanan.

Kwestiyonable sab nga ang usa ka bag-o lang natukod nga kompaniya nga dunay capital nga moabot lang og kapin sa P625,000 makakuha dayon og binilyon nga kantidad sa kontrata.

Gawas niini kadudahan kinsa gyu'y tinuod nga nagpaluyo sa kompaniya sanglit sigun sa Senado ang ubang mga opisyal sa kompaniya wala diha sa address nga ang gideklarar.

Si Lao nga maoy nipirma sa mga kontrata miadmitir atubangan sa Senado nga napakyas siya pagsusi og maayo sa background sa kompaniya ug sa mga opisyal niini.

Apan si Duterte way panaganang miangkon nga igo lang siyang nibayad sa utang tungod sa suporta ni Yang ngadto kaniya.

Matud sa presidente nga si Yang maoy nagsilbing pagador sa mga investor gikan sa China nga gustong mo supply sa gikinahanglang gamit pagtubag sa pandemya dinhi sa nasud.

Midason pa si Duterte nga wa siya'y nakitang sayop ug dautan niini.

Tinuod nga way dautan ang pagbayad sa utang, apan dili husto nga ang mga kontrata sa gobyerno maoy imong himuong pambayad niin.