EDITORYAL - Disiplina ra gyud

Ang indibidwal nga disiplina ug pagtuman sa mando sa gobiyerno bahin sa minimum health protocols maoy pinakaepektibong pamaagi aron masanta ang pagkuyanap sa coronavirus sa komunidad, dili ang bakuna ug dili ang kwarta.

Walay adunahan ug gamhanang nasud ang makapangangkon karong mga panahona nga kontrolado nila ang transmission sa coronavirus sa ilang populasyon.

Bisan sa ilang kamoderno ug ka-advance sa teknolohiya sa medical facilities, abunda ang kwarta ug uban pa, nakamuritsing gihapon sila sa kada adlaw nga bag-ong kaso sa Covid-19 diha sa ilang mga tambalanan.

Kay kung ang solusyon lang niini mao ang kwarta, hagbay ra untang nahunong na ang transmisyon sa maong sakit diha sa maong mga nasud. Angay kining hinuktokan sa mga  gagmay’ng nasud sama sa Pilipinas.

Hinumdoman unta sa publiko nga bisan gani ang Amerika naglisod gihapon karon pagatiman sa mga kaso tungod kay kada adlaw nagkadaghan ang mga nalandig sa tambalanan.

Sagad sa ilang mga pasyente mga senior citizens ug mga masakiton nga natakdan og Covid-19. Ang ilang sitwasyon walay kalainan dinhi sa Pilipinas ug sa uban pang mga mga nasud.

Kini bisan daghan na sa ilang populasyon ang nabakunahan tungod kay wala man sab motuman sa social distancing ug wala magsuot og face mask ang mga tawo. Mao usab ang sitwasyon dinhi.

Bisan unsa pa kadako sa budget nga para sa Covid-19 response sa gobiyerno kun ang mga tawo dili gihapon mosunod sa minimum health protocols magpadayon ang pagsaka sa mga kaso.

Nakapasamot sa sitwasyon kining mga indibidwal nga aktibo kaayong nangampanya ug nagpakatap og mga bakak nga impormasyon bahin sa Covid-19, sa Covid-19 vaccines ug uban pa.

Daghan niini diha sa social media nga mas tuohan pa sa uban nungka sa mga lehitimong media ug mga otoridad.

Mas misalig sila sa impormasyong gipakatap bisan wala sila kaila o nasayod kun unsay kredibilidad sa source sa impormasyon.

Kining mga fake news bahin sa Covid-19 ug vaccines mas paspas pa mokatap ug makatakod tungod ra usab sa mga tawong hangtud karon diskumpiyado sa gobiyerno.

Hangtud nga dili maminaw ug mosunod ang katawhan sa minimum health protocols di mohunong pagpanakod kining Covid-19.