Salamat ni Labella, wa tay bakuna
Kon tinuod ang presyo sa kada dose sa Sinovac gikan sa China nga opisyal nga gipahibawo sa Malakanyang, kapin sa tunga ka milyon na unta ka doses ang napalit sa Cebu City. Kon gigasto pa dayon ni Mayor Edgar Labella ang P400 milyones nga gigahin sa Cebu City Council sa niaging tuig.
Di unta magkamang ang pagpamakuna sa mga Sugbuanon nga labing nameligro nga matakdan ug magrabehan sa COVID-19.
Tungod sa pagpakatug ni Labella sa kuwarta, padayong nameligro nga ma-ospital ug mangamatay ang senior citizens ug mga masakiton.
* * *
Gipahibawo sa Malakanyang ang mga senador nga P650 kada dose ang ilang palit sa CoronaVac, ang bakuna sa Sinovac. Sa ato pa, ang P400 milyones nga gigahin nilang Bise Mayor Mike Rama ug sa mga konsehal makakompra unta og kapin sa 600 mil ka doses.
Makabakuna na unta og kapin sa 300 mil ka Sugbuanon, o dul-an sa katunga (46%) sa target nga populasyon aron maangkon ang herd immunity (674,918 o 70% sa labing uwahing ihap sa populasyon sa Cebu City nga 964,169, segun sa census sa 2020).
* * *
Daghang salamat sa pagyangoyango ni Labella sa pasalig ni vaccine czar Carlito Galvez Jr. nga ang Cebu City usa sa buboan sa daghang bakuna, labihang nihita pa sa mga Sugbuanon nga nabakunahan hangtod sa akong pagsuwat ini.
Segun sa Department of Health sa Central Visayas, 53,500 pa lang ka taga Cebu City ang fully vaccinated. Sa ato pa, 92% ang wa pay proteksiyon gikan sa COVID-19 upat ka buwan na human sugdi ang pagpamakuna.
* * *
Sa pikas nga bahin, nisutoy ang pagpamakuna sa Metro Manila. Daghang salamat sa ilang mga mayor nga mas taas og panglantaw. Di pareha nilang Labella ug ubang lokal nga opisyal sa Sugbo nga ang panan-aw kutob ra sa tumoy sa ilang ilong.
Nakasamot sa kaapiki sa Sugbo ang binuang nga pagtuo nilang Galvez ug kaubanan, samang mga opisyal nga niulug-ulog ni Labella, nga mas daling mabadlong ang COVID-19 sa nasud kon ibubo ang kinadaghanang bakuna sa Metro Manila.
Way nakahunghong nila sa pasidaan sa World Health Organization (WHO) nga way usa nga luwas hangtod nga ang tanan luwas.
* * *
- Latest
