Polis nga bugo mangimbistigar

Kinsa ba kining polis sa Alcoy, Cebu nga nagpakauwaw kay dili maayong mangimbistigar? Mahimo sab nga nagtinapolan ra kay maghuwat man nga hungitan siya og inpormasyon.

Sayonan ka nga may pamilya diay sa usa ka tawo nga gipusil nga nangayo’g tabang sa Alcoy Police Station aron madakpan ug mapasakaan og kaso ang mga responsable sa krimen.

Ang polis igo ra nangutana sa mga kabanay sa namatay kon nakaila ba sila sa nagpusil? Paglabay sa pila ka adlaw, giingnan ang kabanayan sa namatay kon nailhan na ba nila kay ilang pasakaan og kaso.

Dihang miingon ang kabanayan sa namatay nga wa sila makaila, giingna ra sila nga “ipabarang na lang” ang mga nagpatay sa biktima. Porbida, nagpakauwaw ra gyud tawon sa organisasyon sa kapolisan.

Ang kabanayan sa biktima, midangop na lang sa National Bureau of Investigation (NBI) ug nakapasaka gyud sila og kaso, ug gani may duha na sa upat ka suspek nga nadakpan.

Mao na nga ang katawhan mas mobilib sa NBI kay ayuhon man gyud nila sa pag-imbestigar. Awhagon nako ang provincial police director nga siloti na ang maong polis uy.

* * *

Kon gusto man gyud ni Health Secretary Francisco Duque nga pasul-obon og face shield ang mga tawo kon anaa sila sa mga public places, siguroa nga gipatuman gyud kini.

Kay kamo man ang naglangkob sa Inter-Agency Task Force (IATF), paghimo’g paagi nga hingpit kining mapatuman aron nga dili mabutang sa kataw-anan.

Sa ubang mga nasud nga duna pa gihapo’y problema sa COVID, wa man nila pugsa ang ilang katawhan nga magsul-ob gyud og face shield.

Maayo pa og moingon ka Mr. Duque nga dunay klase sa mask nga mao gyud ang gamiton, kay sa ipamugos nimo ang pagpasul-ob og face shield apan anaa ra sa ulo gihimong headband.

Wa gyud tingali kini magsuroy-suroy si Duque, ilabi na sa mga department stores, nga ang mosulod mag-face shield lang inig dayong sulod, apan kon tua na sa sulod sa tindahan gihimong headband ang face shield.

Bisan gani ang mga nagtrabaho sa tindahan wa magtarong pagsul-ob og face shield, ang mga kustomer pa kaha?

Nisulod ko sa Bureau of Internal Revenue (BIR), wa na man gani sila mag-require nga mag-face shield ang mosulod nga mo-transact og business.

Sa subra ka kuti-kutihan niining Mr. Duque, nahinumdom mo nga apil ni siya nga natakdan kaniadto og COVID?

Ang tinuod, ang mask makapugong na pagtakod sa virus kay ang laway sa tawo nga imong ika estorya mapugngan na man nga motuasik kanimo.