Nganong naglunop?

Gihinuktokan nako pag-ayo nganong grabe man ang paglunop sa ubay-ubay’ng mga dapit dinhi sa Dakbayan sa Sugbo dihang mibunok ang kusog nga uwan kaniadtong miaging Sabado.

Apan nahibaw-an usab nako nga ang paglunop sa ubay-ubay’ng mga dapit nahitabo usab didto sa mga silingan nato nga siyudad sa Talisay, Mandaue ug Lapu-Lapu.

Ang tubig nga gikan sa uwan modagayday kini paingon sa kinaubsan ug mosubay sa kasapaan ngadto na sa dagat.

Sa ubos nakong pangagpas, mora’g ang tubig baha maglisud na pag-agos paingon sa dagat tungod sa pipila ka mga hinungdan.

1.) Posible nga ang bukana nga bahin sa sapa dapit sa dagat, mabaw na kaayo ug kon dunay tubig-baha gikan sa downtown area, hinay ang pag-agos niini ug mao nga makamugna og paglunop.

2.) Ang kusog nga baha nga gikan sa kinaibabwan, mosuyla na sa kasapaan kay migamay ang sapa tungod sa mga illegal structures nga gitukod sa daplin ug ang uban, anaa mismo taliwala sa sapa.

3.) Daghang sapa dinhi sa siyudad, ug bisan na diha sa kanait natong mga dakbayan, mabaw na kaayo ug nanginahanglan og pagpalawom, apan kinahanglan nga ang pagpalawom, dili kay lawom pa sa gilawmon didto sa bukana sa dagat.

Akong natan-aw nga ang kagamhanan maayo lang mopasiatab ngadto sa media nga manglimyo kunohay sa mga sapa, apan pakyas sila pagguba sa mga illegal structures nga nakapagamay sa sapa.

Pareho nianang hotel diha sa General Maxilom Avenue nga kanunay’ng moawas ang tubig-baha? Dili ba ang ibabaw sa sapa giapil nila nga gitukoran og building?

Makita nga ang ilang haligi sa building anaa na sa sapa ug apil nga makapahinay sa pag-agos sa tubig, ilabi na kon mangasangit sa ilang haligi ang mga gapnod?

Dugay ra kita nga nakadungog nga ang atong mga opisyal sa kagamhanan nagpasiatab nga aksyonan nila ang problema, apan may nahimo ba sila?

Nganong wa man sila’y nahimo? Tungod ba kay ang maong illegal structure gipanag-iya og adunahan nga magpapatigayon nga posibleng panahon sa eleksyon apil sa mohatag nila’g campaign funds?

Programa ni Mayor Edgar Labella nga sulbaron ang tulo ka dagkong problema sa siyudad.

Kini mao ang traffic, paglunop kon kusog ang uwan ug ang basura.

Gipiyal na ni Mayor Labella sa iyang mga sakop ang pagsulbad niining maong problema, apan hangtud karon, usa ka tuig na lang ug mapupos na ang termino sa mayor, wa pa gyud nila masulbad.

Tan-aw nako, magkinahanglan kita og political will aron nga mapatuman ang kamandoan sa mayor.