Pangandam alang sa 2022 elections

Bisan kon medyo layo pa ang 2022 nga eleksiyon, ang atong mga politiko, kadtong dili magpapuli sa gahom ug kadtong buot makahupot og gahom, busy na. In fairness, hinuon, ang nagtukmod kanila paglansar mao gayud ang ilang dakong gugma ug tinguha pag-alagad.

Silang tanan buot moalagad ug buot magpaulipon sa lungsod. Kon buot hunahunaon, mga bayani kini sila, tungod kay dili kitang mosugot nga himuong sulogoon sa lungsod.

Alang kanila, ang pagka-public servant usa ka dakong sakripisyo. Anyway, ang ilang gi-target mao man ang Oktubre nga maoy pag-file sa mga certificates of candidacy. Upat na lang ka buwan. Matud ni Elfren Cruz sa Philippine Star: “October is just around the corner.” Kulba no?

“Those with political ambitions must now start positioning themselves and must start a campaign for name recognition,” nagkanayon si Cruz.

Apan, between now and October, daghan pang mahitabo. Daghan pang mga realignment ug mga pagsabutsabot tali sa mga partido. Hinuon, duha ra man ang atong major parties o grupo nga karon naglihok, ang sa administrasyon ug sa oposisyon.

Kini ra bang politika sa atong nasud, gibasi sa popularity ug personality ug dili sa mga isyo ug dili sa baruganan ug ideology sa ma partido. Ug kining popularity, imong maangkon kon daghan ka’g kwarta.

Matud ni Cruz: “There have been attempts in the past to launch political parties based on ideology, but this has not been sustained.” Lahi sa America nga ang ilang pagbotar didto, gibasi sa mga baruganan ug prinsipiyo sa duha ka partido, ang Democrat ug ang Republican.

Dinhi sa ato, sa ato nang giingon: popularity ug personality sa mga piliunon ang mahinungdanon. Meaning, kon nanubra ang imong qualification ug dii ma-question ang imong kaligdong, apan kon dili ka popular, dimalas ka.

Laing factor nga makabintaha sa usa ka kadidato, mao kon kinsa ang nag-endosar og nagtugpo kaniya.

Hinumdoman nga sila si kanhi Presidente Gloria Arroyo ug Noynoy Aquino wala makapadaug sa ilang gi-endorse nga kandidato pagka-presidente.

Pagkakaron, wa pay klaro ang tanan. Although pinasikad sa mga survey, ug mga kisaw sa katawhan, giingon nga nag-una si Mayor Sara Duterte pagka-Presidente. Kinsa may iyang bise?  Mosugot kaha si Presidente Duterte nga mag-bise sa iyang anak? Matud pa, politics is addition.

Busa mahinugdanon kaayo nga ang imong running mate pagka-bise, kinahanglan makadugang sa imong votes. Ug kwentada ni Cruz: “The idea of her father running for vice president does not make political sense. Politics is addition, and a Duterte-Duterte ticket will not add anything substantially.”

Iksakto kaha ning pangagpas ni Cruz?

Sa side sa oposisyon, samot nga wa pay klaro. Dako nilang problema mao ang paghiusa. Naglisod sila pag-unite tungod kay medyo ubay-ubay na man nga mga ngalan ang mibutho nga buot modagan pagka-presidente ug pagka-bise.

Wala silay klaro nga partido. Wala silay klaro nga organisasyon. Unsaon nila pagadagan sa kampanya? Unya, problema sila sa campaign funds. Hinoun, dili na man tingali gastuso karon ang eleksiyon, tungod sa pandemic, ipaagi na lang sa social media.

Ang-ang og mag-rally ka, unya pila ray manambong, maglayuay pa gayud, mag-physical distancing ang maminaw nimo. Ganahan ka mo-diskurso?