Dakong hagit

Dakong hagit unsaon pagtuman ang tinguha sa nasudnong gobiyerno nga makab-ot ang herd immunity karong Disyembre.

Ang vaccine czar sa nasud nga si Secretary Carlito Galvez unang namahayag nga ilang tinguha nga makab-ot sa Pilipinas ang herd immunity sa katapusang bahin niining tuiga o ba kaha sa sayong bahin sunod tuig.

Kini nagpasabot nga kinahanglang mabakunahan batok sa COVID-19 ang 70 porsiyento sa mga Pilipino. Ang labing awahing census nagpakita  nga dunay kapin sa 110 milyones ang populasyon sa Pilipinas.

Aron makab-ot ang herd immunity kinahanglang mabakunahan ang labing minus 77 milyones.

Apan unsaon kun kuwang ang supply sa bakuna ug way igong gidaghanon sa vaccination centers?

Pananglitan dinhi sa dakbayan sa Sugbo, aron makabaton og herd immunity kinahanglang mabakunahan ang labing minus 700 mil ka mga molupyo.

Apan sukad gisugdan ang pagpamakuna niadtong hinapos sa Marso, 20 mil pa lang ang nabakunahan sa unang dose ug naa sa 3 mil ang nakakumpleto na sa duha ka doses.

Si Dr. Jeffrey Ibones, pangulo sa City Health Office, miingon nga sama sa nasudnong kagamhanan ilang problema ang supply sa bakuna.

Way kaugalingong bakuna ang dakbayan ug nagsalig kini sa hinatag gikan sa Department of Health.

Laing problema nilang Ibones mao ang kakuwang sa mga vaccination centers.

Aron mahuman og bakuna ang kapin sa 700 mil nila nga target sa dili pa matapos ang tuig, nagkinahanglan ang dakbayan og 15 ngadto sa 20 ka mga vaccination centers.

Sa kasamtangan duna lay tulo ka mga centers ang Cebu City nga anaa mahimutang sa UC Banilad, SM Seaside ug Robinsons Galleria.

Mipasabot hinuon si Ibones nga duna na silay plano sa higayon nga duna nay abundang supply sa bakuna.

Apan dili mahimong way mga doktor ug ubang medical personnel nga modumala sa mga sentro.

Kinahanglanon napud sa dakbayan ang dugang personnel nga modumala sa mga vaccination centers.

Matud ni Ibones nga gawas sa mga volunteers kinahanglang mohire ang dakbayan og dugang mga personnel alang niini.

Lain na pud ning problema tungod kay nagkagidlay ang panudlanan sa dakbayan sa pagkakaron.

Gani mo lima ka buwan na nga wala ni kapanuweldo sa mga job order nurses. Lakip ang mga trabahante sa barangay wala kasweldohi sa dakbayan.

Kinsa may motrabaho kun dili kabayad ang dakbayan sa obligasyon niini sa tukmang oras?