Kasina ba ang hinungdan?

Matud ni Sec. Roque ang Julian Felipe Reef saylo na sa EEZ sa Pilipinas.Gihulagway ni DFA Sec. Locsin nga nahisupak ang maong pamahayag sa mga diplomatikanhong protesta nga gihimo sa DFA alang sa Pilipinas ug nga angayan nga ang “international diplomacy” ipiyal lang ngadto sa DFA.  Ni’ng kahimtanga, nahimong lokal ang unta langyaw nga isyu kabahin sa soberanya.  Kon kasina ang hinungdan, tukma ang panultihon nga, “Bisan usa na ikaw ka maanyag nga bulan, mahimong masina ka gihapon sa mga bitoon”.  Fezteleern!

Dili moangkon nga nailad

Mipasidaan ang Department of Human Settlements and Urban Development sa publiko nga magmabinantayon labi na sa pagpalit ug mga yuta ug mga “property rights” gikan mga squatting syndicates.  Wala magkulang ang kagamhanan sa mga pasidaan batok sa pangilad bisan maingon nato nga nagkulang ang kagamhanan sa pagpanakop sa mangingilad.  Ang rason ngano nga daghan gihapon ang mailad tungod kay, matud pa ni Mark Twain, “Mas sayon pa ang pag-ilad sa tawo, kay sa pagkumbinsir kaniya nga nailad na siya”.  Isip-isip!

Wala pa mosurender

Gisubli ni Presidente Duterte ang iyang hangyo pagkab-ot sa kalinaw sa Mindanao, human sa hitabo nga pagsakmit sa BIFF sa merkado sa lungsod sa Datu Paglas, Maguindanao.  Dugang pa sa Presidente, dili mahimo’ng makiggubat ang kagamhanan batok sa iyang katawhan.  Dakong hagit sa kagamhanan ang pagkab-ot sa gimithi, apan idlas, nga kalinaw sa Mindanao.  Makapahinumdom sa pasiaw bahin sa pangulo sa mga rebelde nga gipangutana ngano’ng wala pa’y kalinaw ang Mindanao, yano kini’ng mitubag nga “Aay, kon dili mo-surrender ang military, wala’y kalinaw sa Mindanao”.  Pagka-tulokibon!

Pag-kinabuhi uban ang virus

Nabatyagan sa DOH nga nag-anam na pagkunhod ang kahadlok sa katawhan sa COVID-19 hinungdan nga milugak na usab ang ilang pagtuman sa mga health protocols.  Matud pa sa DOH, ang kinaiya sa pagpabaya nga naumol sa katawhan paglabay sa panahon mao’y dakong hagit sa kagamhanan pagbatok sa COVID-19.    Angayan na tingale bag-ohon ug wagtangon ang mga protocols nga gi-base lamang sa kahadlok.  Ang pagka-walay trabaho ug kagutom ingon man pagkaburyong tungod sa taas nga lockdown dako nga hinungdan sa naumol nga kinaiya.   Tun-an na nato ang pagkinabuhi uban ang virus.  Let’s DOH it!

Pangilad sa kampanya?

Matud ni Presidente Duterte pasi-aw ra ang iyang giingo’ng pagsakay og jet ski paingon sa isla sa West Philippine Sea aron pag-ugbok sa atong bandila didto.  Apan matud ni Justice Carpio, nakapalingla kini sa katawhan aron makuha ang ilang boto.  Mahimong dili nato ikahimuot ang pasiaw sa Presidente apan dili usab makatarunganon ang pamahayag ni Carpio nga nailad ang katawhan.  Adunay kaugalingong kabuot ang katawhan sa pagpili sa ilang lider.  Dili igsapayan sa katawhan ang panagbangi sa hunahuna; ang kasilag nga gibatunan sa usa’g-usa maoy dakong isyu.  Daghang brayt!