Andam na ba ang tanan?

Nakapangandam na ba ang tanan alang sa umaabot nga El Niño phenomenon? Matud sa mga eksperto sa kalikopan, kining maong kalamidad usa sa labing ngilngig nga hulaw sa kasaysayan sa kalibotan.

Gani gibanabana nga ang maong El Niño phenomenon mokutlo sa dili moubos 250,000 ka kinabuhi sa mga nasud nga maapektohan unya niini. Ug ang Pilipinas maoy usa sa giingong seryoso nga maapektohan.

Mao nang nakapanguta ako kon andam na ba ang tanan dinhi sa nasud ini'g hapak na unya niining maong kalamidad. Kay basin kon ayha ra kita managang kon molapdos na kini ug ulahi na unya ang tanan.

Hinaut nga miarangkada na ang mga mitigating measures sa national government batok niining umaabot nga dakong hulaw. Kinahanglan nga nagsugod na og implementar ang gobiyerno sa mga programa pagtabang sa katawhan aron maibsan ang epekto nga ilang sagubangon.

Alang sa mga lokal nga kagamhanan, hinaut nga andam usab sila sa pagsagubang unya sa mga panginahanglan sa ilang mga lumolupyo. Kinahanglan nga dili nila paaboton ang dakong bul-og unya sa mga reklamo gikan sa katawhan.

Ug labaw sa tanan, kinahanglan nga mismo ang mga lumulupyo ang unang mangandam batok sa El Niño phenomenon. Kinahanglan nga anaa sa matag panimalay ang first line of defense batok sa maong katalagman.

Ang nakapait usab kanatong mga Pilipino mao nga kanunay kitang magsalig sa gobiyerno panahon sa kalamidad. Mao nang naanad na kita niiniing mga nagkadaiyang ayuda ug dili na lamang maningkamot.

Adunay dakong kalamidad ang motunga ug kinahanglan nga ato kining pangandaman. Dili nato isalig sa kagamhanan ang tanan. Kita mismo ang mangunay. Kon aduna man ugaling tabang gikan sa gobiyerno, bonus na kana.