Pagdaut nga nagpasikat

Mikuyanap karon sa nasud ang mga community pantry nga nagsugod didto sa kaulohan. Ang mga community pantry gipilahan ug gidugok sa mga tawo nga gustong makapahimulos niini. Ang mga community pantry nakaani og mga pagdayig sa katawhan nga naaghat na usab sa pagtabang niini aron makalahotay sa pagtabang sa mga tawo nga nanginahanglan kaayo ning panahon sa pandemiya.

Apan samtang midayig ang nagkalainlaing sektor sa katilingban sa mga community pantry nga gipasiugdahan sa mga tawong nagpakabana, wala mahimuot niini ang National Task Force to end Local Communist Armed Movement (NTF-ELCAC) ug ang propaganda group sa Malakanyang. Ang NTF-ELCAC namasangil sa mga nagpasiugda sa community pantry nga mga rebelde ug konektado sa mga komunista ug giharas  ang mga organizers sa Community pantries.

Ang pag-red tagged sa NTF-ELCAC sa mga nagpasiugda sa community pantry misumbalik kanila human sila gisaway sa mga tawo apil na ang mga sakop sa Kongreso, mga opisyal sa ubang departamento sa gobiyerno, gabinete ni Presidente Rodrigo Duterte kinsa gisalikway ang mga gibuhian nga pulong sa tigpamaba sa nahisgotang task force.

Ang pagdaut sa NTF-ELCAC  sa nga community pantry pinaagi sa pagkonektar niini ngadto sa mga rebelde nga mga komunista nagpasikat lamang sa mga rebelde nga mga komunista. Ang NTF-ELCAC mihulagway hinuon sa mga rebelde nga komunista nga manggihatagon ug matinabangon. Ang gihimo sa NTF-ELCAC nag-promote ug nagpahumot hinuon sa mga komunista nga ilang gikalagotan ug gikasilagan.

Kun akoy Presidente Rodrigo Duterte nga maoy Chairman sa NTF-ELCAC akong tangtangon ang tigpamba sa nahisgotang task force.

Dinhi sa Pilipinas, ang motabang tawgon nga rebelde ug komunista. Ang nahitabo sa nagpasiugda sa mga community pantry susama sa nahitabo kaniadto sa usa ka pari nga mipakaon sa mga kabus. Gidayig siya sa iyang gihimo apan sa dihang nangutana siya nganong ang mga tawong iyang gipakaon gipanggutom, gitawag siya nga rebelde.