Vaccine naa na, tinakdanay nahunong ba?

Paghugpa sa COVID-19, puwerting panago sa katawhan. Gawas sa pipila ka mga gahi kaayog ulo, kinsa sayon ra man unta sabton ang nalatid nga balaod sa kuwarentina, ug nganong maglisod man gyod pagsunod?

Sa mga nasod nga sobra ka higpit mopatuman sa ilang balaod, pagmandar sa ilang lider nga walay mogawas-lakawlakaw sa dalan, dihadiha, tanan mituman! Kay kadtong magmasinupakon, sila nasayod nga mahimong bala sa kamatayon ang isilot kanila kon sila magpabadlong. Aw, panahon sa lockdown, mingaw kaayo ilang dalan.

Pero dinhi sa Pilipinas, bisag paguwardiyahan pag tangke de giyera ang karsada, asa mahadlok? Mangaway pa kon badlongon sa polis. Unsaon, kon madakpan, seminaron ra man, paehersisyohon, pasilhigon. Unya, inig human, makauli na.

Samot, dihang gipaluagan sa gobiyerno ang pamalaod sa kuwarentina ug gipahibalo nga may mga bakuna na sa  COVID-19 vaccine nga moabot sa atong nasud. Hasta empleyado sa mga dagkong buhatan, nangaluag sab ang kahugot sa pag-amping.

Hinungdan, nga taliabot pa gani ang vaccine, ang tinakdanay sa siyudad sa Sugbo nga mi-one digit na man unta kadto, nahimong two hangtod na-three. Sa Manila? Mas grabe. Kay 4 digits.

Gani, niadtong Marso 28, sa mao lamang adlaw, base sa Department of Health’s record, adunay 9,745 ka tawo ang nangataptan.

Kini bisag miabot na ang mga bakuna ug aduna nay nabakunahan. Apan imbes pagtinakdanay mahunong, mipaspas hinuon. Ngano?  Ubay-ubay ang mga hinungdan nga matumbok.

Una, ang pagkabadlongon gyud sa pipila kanato, kinsa bisag nangintawon na ang kagamhanan sa hugtanong pagsunod sa tanang lagda sa health protocols, nagpabiling walay kaluoy sa pagsupak niini. Ikaduha, ang paghangop sa sobrang kompiyansa. Kay aduna nay vaccine, hala, dili na mag-facemask. Total, may vaccine bitaw. Mentalidad nga nahitalay sa ‘maling akala.’

Nahinumdom ko sa gisulti ni Tatay Digong niadtong gi-lockdwon ang tibuok nasod, diin siya miingon, nga kon aduna lay bakuna ining COVID-19, mahimong pabuksan dayon niyag balik ang tanang gipaserad-ang balay-patigayon. Laing matang sa kompiyansa.

Ang kagahig ulo ug sobrang kompiyansa sa tawo maoy hinungdan nganong dili mapalong ang pagtinakdanay. Ug dili gyod kini molurang hangtod makabaton ang usag-usa kanato og kabuotan sa pagsunod sa tanang balaod sa kaluwasan dinhi sa yuta maingon sa langit.