Ayaw mo kasuko

Nakapanglingolingo ko nga nagbasa sa daghang komentaryo sa mga senior citizens dinhi sa Dakbayan sa Sugbo nga nanaway kabahin sa pagpanghatag og cash assistance kanila gikan sa City Hall. Gisaway nila si Mayor Edgar Labella nga palpak kuno ang pagdumala kay natagbaw kuno silang senior citizens pagpinaabot nga mahatagan sa ilang cash assistance niadtong Sabado ug wa gyud moabot ang pagador.

Pastilan tawon, nagpataka lang gyud sila og kasuko. Ang gisulti sa mayor mao nga magsugod ang mga pagador sa City Hall sa pagpanghatod sa mga cash assistance Marso 27. Unang adlaw pa kini sa pagpanghatag.

Sa akong programa sa radyo DYLA kada gabii, ako gyud kining gipasabot pag-ayo, ug kadtong mga naminaw ug nagbasa sa akong lindog, nakasabot gyud. Gani, daghang nag-chat kanako nga nagpasalamat.

Nasabtan usab nako nga ang uban sa mga sabaan kaayo mao kadtong mga senior nga wa na magpuyo dinhi sa siyudad kay matud nila, dugay silang gihatagan nga layo pa ra ba kaayo ang ila. Nganong layo man nga ang giingon sa mayor pahuwaton ra man kamo sa inyong balay kay ipanghatod ra man ang inyong cash assistance? Nagpasabot lang ni nga wa na mo magpuyo sa siyudad. Pero sagdi lang og wa na kamo magpuyo dinhi sa siyudad ug nagsige pa gihapon mo’g kubra og financial assistance, apan ayaw lang kamo pag-apura kay kapin sa 84,000 ka seniors ang hataganan, ug dili ra kay kamo.

Alang niadtong nahatagan na og cash card sa Land Bank unya wa maka-activate dayon sa ilang mga ATM, ayaw mo kabalaka kay ang kwarta anaa na sa inyong account, dili pa lang hinoon ninyo makubra kay hatagan pa mo og bag-ong PIN.

Unya, ang siyudad diay maoy inyong basulon kon wa mo dayon makadawat sa cash assistance kay ni-expire ang inyong mga ATM? Ang uban lagi nga mituman sa mga gimando kanila wa may problema?

Gusto man unta ko nga motabang apan kadaghan sab sa atong mga lolo ug lola, apil pa gani ang ilang mga apo, nga magpataka lang pagpanaway nga wa usa hunahunaa kon angay ba silang masuko.

Dunay uban miingon nga botante na kuno sila dinhi sa siyudad sa eleksyon kaniadtong 2016 ug 2019, apan wa pa sila maapil sa lista sa mga senior nga makadawat.

Klaro kaayo nga sila gikan sa laing lugar ug namalhin ra sa pagpuyo dinhi. Huwaton lang nato nga himoan og ordinansa sa City Council nga kamo maapil na nga mahatagan.

Kalma lang mga lolo ug lola, ako gani wa pa man sab makadawat apan nagyawyaw ba gud ko? Gamay lang nga pailob lolo ug lola.