Stairway to heaven

Naputol ang kutay sa pagsulat nako’g artikulo dihang isog kaayo akong selpon nga mikiring. Gipunit nako ug gipislit ang ‘accept button’ aron mahilom. Tuod, sa makadiyot, nahunong.

Unya sa hinayhinay, milutaw ang tingog sa higala kong pinanser.

Matud niya, wala na kunoy ayo iyang negosyo. Diyotay na lang iyang kustomer. Mahadlok na pod siya mopahulam og dinagko. Kay basig ma-COVID, delikadog matiklo! Ma-T.Y. tanang utang?

Bisag bilyonariyo pa, wala siyay kompiyansa. Kay simbakog maintimano’g kaigo ug ma-TKO, pagkalabad sa ulo!

Unya, mipalain pag-asoy ang pinanser. May dato kuno, ilado kaayong pamilya, kinsa tanang miyembro natakboyag COVID-19.  Duroha na ang namatay: ang igsuon sa asawa ug ang asawa mismo. Samtang ang bana padayong nakigbugno sa kamatayon ug kinabuhi sulod sa ICU room.

Sa wala pay COVID, pirmeng moduol kining maong pinanser kada pamahaw nako didto sa akong trabahoan. Open kaayo siya sa dakong problema sa ilang pamilya, diin ganahan siyang maminaw sa akong mga espirituhanong panahom. Hinungdang nagkasuod mi.

Hinuon, nagpabiling natunga ilang pamilya. Unsaon, dato man kaayog kagikan ang asawa. Nagtubong spoiled hangtod nadala sa kaminyoon. Busa, bisag giunsa sa pagpaubos sa akong amigo, nagpadayon ang kamapahitas-on sa misis. Resulta, dunay anak nga milaban sa mommy ug naa poy midapig sa daddy.

Ang nakaayo, kay wala mobulag akong amigo sa Ginoo. Misamot kahugot ang iyang pagsalig ug pagtuo Kaniya. Lig-ong rason, nga bisag nagkaambihas ilang kinaiya, pabiling intact ilang pamilya.

Sa 2021 Lenten Recollection ni Fr. Ciano Ubod, iyang gipaambit sa tanang YouTube onliners ang Stairway to Heaven, diin may 14 ka ang-ang (steps):  7 ka Corporal Works of Mercy ug 7 ka Spiritual Works of Mercy.

Sa Corporal mao kining mosunod: Feed the hungry, Give drink to the thirsty, Clothe the naked, Welcome the stranger, Care the sick, Visit the prisoner ug Bury the dead. Samtang sa Spiritual: Counsel the doubtful, Instruct the ignorant, Admonish sinners, Comfort the afflicted, Forgive offenses, Bear patiently those who do ill ug Pray for the living and the dead.

Kon kining tanan, imong gibuhat sa inadlaw natong pagpakabuhi dinhi sa kalibotan, congratulation! Kay giandaman ka na daan sa atong Ginoo og dakong luna didto sa langit.