Mga irresponsible

Nangluwat ang pito ka mga konsehal sa Sangguniang Kabataan sa Barangay Pusok sa dakbayan sa Lapu-lapu tungod kay walay nahimo ang ilang chairperson. Ang chairperson sa Sangguniang Kabataan sa Barangay Pusok mao usab ang presidente sa SK Federation sa dakbayan sa Lapu-lapu.

Reklamo sa mga konsehal nga nangluwat sa ilang katungdanan, tulo ka tuig na silang walay nahimo tungod sa dili pagka aktibo sa  ilang chairperson. Gani, wala gayud kini mo-communicate kanila ug mag-session lang sila kun buwanon. Dili politika ang rason sa pagluwat sa ilang katungdanan.

Gikonpirmar sa kapitan sa Barangay Pusok nga dili aktibo ang ilang SK chairperson, gani panagsa ra kini nga motambong sa ilang session sa konseho sa barangay ug panagsa ra usab kini nga magpatawag og session sa SK Council.

Ang pagluwat sa katungdanan tungod kay walay nahimo ang SK sa maong lugar dili tubag sa suliran nga sila usab mismo adunay kasal-anan. Ang pagluwat sa katungdanan maisip nato nga pagpanghunaw sa ila mismo nga kapalpakan ug pagpabaya sa ilang katungdanan.

Ang chairperson o chairman usa lang sa opisyal sa konseho sa Sangguniang Kabataan. Ang konseho sa Sanggunian Kabataan gilangkoban kini sa mga pinili ug tinudlo nga opisyal. Ang pinili mao ang chairman o chairperson ug mga konsehal samtang ang mga tinudlo mao ang SK secretary ug treasurer.

Kun natulog o nagpabaya ang chairman o chairperson sa Sangguniang Kabataan, katungdanan ug responsibilidad sa mga konsehal ang pagpukaw o pagpahinumdom kaniya sa nakalimtan nga katungdanan. Apan wala kini himoa sa pito ka mga konsehal nga nangluwat sa ilang katungdanan. Sa ilang pito walay gyuy usa nga namokaw sa natulog nilang chairperson? Unsaon man nato ni sa pagsabot, dili ba apil pod sila sa paghagok sa ilang chairperson?

Ang SK nanginahanglan pa gihapon og giya sa mga opisyal sa barangay. Pero dinhi atong makita nga wala sila magiyahi. Akong sugyot sa mga SK councilor sa Pusok, bakwia ang inyong resignation ug i-communicate ang inyong chairperson. Samtang sa mga opisyal sa Barangay Pusok, giyahi ug ayaw pasagdi ang inyong SK.