Seniors FB page

Nakabantay ko nga daghan na kaayong karsada dinhi sa dakbayan sa Sugbo ug Mandaue nga gihimoan og “bike lanes” aron anha mosubay kadtong mga magbisekleta.

Ang nindot niini mao nga ang mga opisyal magmugna sab og balaod nga kadtong magbisekleta unya dili mosubay sa “bike lanes,” pamultahon sila.

Kinahanglang maghimo og ordinansa ang mga opisyal sa kagamhanan nga maoy basehan nila sa pagpamulta sa mga magbisekleta nga dili motuman sa lagda. Kon naa na sila’y bike lanes, dili na sila angay’ng mosubay sa agianan sa mga four-wheel vehicles. Unya, apil nga pamultahon kadtong mga bicycle riders nga dili motuman sa traffic lights.

Dili sabton nga abi kay wa sila’y lisensiya dili sila motuman sa lagda sa traffic, kay sa ilang pagtapok sa karsada bisan og Stop pa ang signal, naghatag sila’g risgo sa ubang motorista.

Kaniadtong Domingo, usa ka tawo nga nagbisekleta diriyot gyud madam-agi kay bisan og Stop ang signal, miikid-ikid man gyud sa pagpadagan.

Aron mapugos pagbayad og multa ang mga magbisekleta nga dili motuman sa lagda, ilatid gyud nga sakmiton ang ilang bisekleta.

Sa ingon niini nga paagi mahadlok na kadtong mga magbisekleta nga nagtuo nga “exempted” pagpadayon pagdagan sakay sa ilang bisekleta bisan og Stop ang signal sa traffic lights.

Kon nadam-agan pa kadtong maong tawo, aw, makakat-on gyud unta siya og leksiyon. Maayo gani kay nakapahunong pagdali kadtong nag-drive sa awto, apan nagkagot tingali ang ngipon niadto sa kalagot.

Ambot og duna ba kaha’y mga konsehal nga makabaton og kaisog pagsugyot og balaod kabahin niini nga hapit na ra ba ang eleksiyon. Saludohan nako kadtong mga konsehal nga makaduso og ordinansahon bahin niini.

* * *

Angay gyud nga ang Office of Senior Citizens Affairs (OSCA) sa Dakbayan sa Sugbo magmugna og “Official Facebook Page” aron anha ang mga senior citizens mokuha og mga tukma nga kasayuran.

Pagkakaron, duna kay makita diha sa Facebook nga Cebu City Senior Citizens apan dili kini iya sa kagamhanan sa siyudad. Tungod niini, bisan kinsa, ang uban gani dili senior citizens, makahimo pag-post og dili tukma nga kasayuran.

Samtang daghan ang nagtinarong, dunay uban nga bisan wa sila makasayod moapil gyud, ug makamugna hinoon kini og kaguliyang.

Dunay miingon nga ang senior citizens cash assistance dinhi sa siyudad ipanghatag na kuno karong adlawa (Marso 8), duna sa’y miingon nga Marso 20.

Ang tinuod, mando ni Mayor Labella nga karon pang hinapos sa buwan, aw kon madala sa petsa 20, mas labing maayo, apan wa pa mopahibawo niini ang OSCA.

Kon may “official page” na sa FB ang OSCA, ayuhon na nga way makahimo og sayop nga kasayuran.