EDITORYAL - Doblehon pa gyud

Way laing makatabang pagpamenus aning mga kaso sa coronavirus disease karon sa Dakbayan sa Sugbo kondili ang mga tawo ra gyud gihapon pinaagi sa ilang boluntaryong pagtuman sa mga health protocols nga walay daghang kuskos balungos.

Ning bag-o, ang Emergency Operations Center sa Cebu City mipahibalo nga sagad sa mga nataptan sa kaso karon nakakuha aning virus gikan sa trabahoan ug aning mga karenderiya. Sa mga karenderiya ug bisan asa pang kan-anan manangtang man gyud og facemask ang mangaon. Ang kalainan lang sa duha, kaning sa mga mahalong mga kan-anan ug bisan kanang mga fastfood chains dunay record alang sa contact tracers samtang sa mga karenderiya wala. Apan ang karenderiya wala apan mao ra man sab tawoy kaya sa bulsa sa mas daghang mga tawo ilabi na adtong mga gagmayng trabahante.

Kung tungod lang niini pangsirad-an sila dili na makatarunganon. Asa man sab dagan intawon kining gagmay og sweldo? Dili mahimong pakasad-on ang mga nanginabuhi sa pagpaninda og pagkaon. Naa ra gyud gihapon kining tanan sa tawo pagsunod gyud  untasa health protocols. Kung daghan pa ang sud sa kan-anan, dili lang una mosulod, sundon ang social distancing samtang namili og sud-an ug manghugas og mga kamot sa dili pa ug kun mahuman na og kaon.

Dili na baya gyud unta kinahanglan pang pahinumdoman sa mga naninda ang mga tawo nga mag-social distancing kay responsibilidad kini sa tagsa-tagsa ka tawo nga dili mataptan.

Way laing makapahunong aning padayong pagsaka sa gidaghanon sa mga kaso kondili ang kooperasyon sa mga tawo ug pag-level up sa mga otoridad.

Karong panahona nga halos nibalik na ang operasyon sa tanang patigayon ug panarbaho kinahanglang doblehon pa sa EOC ug sa lokal nga otoridad ang pagbantay labaw pa sa ilang gihimo sa miaging tuig.

Tungod kay kaniadto higpit kaayo ang restriksyon maong kontrolado kaayo ang paglihok sa mga tawo, nakatabang gyud kadto pagkontrol sa pagkuyanap sa virus. Apan kaniadto kontrolado tuod ang mga tawo tungod sa mga restriksyon daghan man sab ang nawad-an og panginabuhian. Apan dili kadto maayong buhaton pagkakaron kay naglisud pagbangon karon palang ang ekonomiya sa nasud.