Gipasaligan aron lang pakyason
Nipasabot si Cebu City Mayor Edgar Labella nga, lahi sa ubang local government units (LGUs), wa siya mag-apura pagpamalit og bakuna batok sa COVID-19 kay gipasaligan siya ni vaccine czar Carlito Galvez Jr. nga ang dakbayan mao ang usa sa unahon sa nasudnong gobiyerno sa pagpamakuna.
Sama sa uban niyang pasalig sukad sa pag-ulbo sa pandemiya kapin sa tuig na ang nilabay, haskang sayopa sa mayor.
Way bisan usa ka bakuna nga madawat ang dakbayan inig abot sa pasiuna nga 117,000 ka doses sa bakuna sa Pfizer/BioNTech sunod semana.
* * *
Pulos taga Metro Manila ang makadawat sa bakuna: Mga dakbayan sa Manila (Philippine General Hospital), Caloocan (Dr. Jose N. Rodriguez Memorial Hospital and Sanitarium) ug Quezon (Lung Center of the Philippines ug East Avenue Medical Center).
Ambot maapil bang Sugbo sa 9.2 milyones ka doses sa bakuna sa AstraZeneca nga gipasalig nga moabot sunod buwan.
Nipasidaan ra ba si Galvez nga ang hatagan og bakuna mao rang LGUs nga nakahingpit sa ilang vaccination plan.
Hangtod niadtong Biyernes nangita pang Cebu City Council hain nang plano ni Labella sa pagpamakuna.
* * *
Sa makadaghang higayon nipahibawo si Presidente Rodrigo Duterte nga gipasaligan siya sa China nga apil ang Pilipinas sa unang makapahimus sa mamugna nga mga bakuna.
Tuod man, gipahibawo sa Malakanyang nga mohatag ang China og 500,000 ka doses sa bakuna sa Sinovac.
Hangtod karon wa pa igkita ang donasyon sa China. Sa pikas nga bahin, gipahibawo sa Cambodia nga nadawat nila niadtong Domingo ang 600,000 ka doses sa bakuna sa Sinopharm (nga gipanag-iya sab sa China).
* * *
Human sa iyang pagkatudlo isip vaccine czar niadtong Nobyembre sa niaging tuig, gidasonan ni Galvez ang balikbalik nga pasalig ni Presidente Duterte nga ang Pilipinas maoy usa sa labing una nga makapamakuna batok sa COVID-19.
Ikaduhang semana na sa Pebrero 2021, wa pa kasugod ang pagpamakuna sa Pilipinas. Sa pikas nga bahin, ang Bangladesh, nga mas kabos ug mas dako og populasyon kay sa Pilipinas, nakasugod na og pamakuna niadtong Domingo; ug ang Myanmar, kansang mga heneral ni-kudeta sa sibilyan nga gobyerno niadtong Pebrero 1, nakabuylo na sa pagpamakuna sa niagi pang buwan.
* * *
- Latest
